U·IATTIMGIPAONI
SHILLONG: Batanggimin bilsi 3-o Meghalaya a·dok gimiko rama a·sel ong·ao sak 500-na bate manderang siaha.
A·dok a·briarigipa ong·anio aro ramarang adita a·solsol dakanio neng·nikaniko man·e adita siani numbor-rang bang·a. Iarangna agreba, skelskel dake gariko sala, ta·rak dugae sala aro chu ringe gariko salani a·selan mongsongbate a·doko rama a·sel ong·e sianirang bang·batengaha.
Meghalaya police statistic-ni parakatani gitade, 2020 bilsio chang 205 rama a·sel ong·aha jeon sak 138 manderang siaha aro sak 212 manderang saknaaniko man·tokaha.
2021 bilsio, sak 187 rama a·selrang ong·ao sia bataha aro sak 263 manderang saknaaniko man·angaha.
Batanggimin bilsio, a·doko chang 246 traffic rama a·selrang ong·aha jeon sak 162 manderang siaha aro sak 310 manderang saknaaniko man·aha.
Chang 246 a·sel ong·gipa gimikko statistic-ni gita parakatanio, ta·rak dugae salanio chang 115 a·selrang ong·aha, kenbegnigipa ba batsotna seksekani ba simsakani aro ugita dakgiparango chang 68 a·selrang ong·aha.
Apsan dake, pekgipa cha·ani ringani ba chu indakgiparangko jakkale gari salanio batanggimin bilsio chang 24 rama a·selrang ong·aha.
2021 bilsio, ta·rak dugae gari salanio chang 103 rama a·selrang ong·angaha, kenbegni ba simsakani ba batseksekna jotton ka·anio aro ugita dakgiparango chang 70 a·selrang ong·aha. Pekgipa cha·ani ringani ba chu indakgiparangko jakkale gari salanichi chang 39 ramao a·sel ong·aha.
A·dokni skotong songjinmaoba, bang·a manderangni ramao a·sel ong·anirangko nika aro mongsongbate chadambe me·asarang garirangko aro chaka ronggnigipa gariko ta·rak ta·rak dake salani a·sel ramao a·selko chagrongenga.
Nangchongmotgipa gari salani skill-rangko porikka ra·e nikchenggija bang·a manderangna licence-ko on·enganina Shillong-o somoiantion sing·anirang sokbaenga.
Songjinmao Shillong Police-rangba da·ororode jedakgipa am·sandianirangkoba basakobasan dakaiengaha, aro naljoke gari salani bisingo mikrakatani awareness program-rangkoba gisepo basakobasan ong·atna man·aiengaha.
Mitam manderang agana, songjinmao mongsongbate a·sel ong·batgipade chaka ronggni gariko ta·rak dugae chadamberangchi salengao a·sel ong·batenga jeon uamangna maming gamchatani donggija dake ra·an baksana sakgipinrangnaba simsakani dongja. Uamang dontonggija uamangni lane-rango maming chanchia gri gipin garirangko salsekseke kata.
Shillong songjinmao mongsongbate a·sel ong·batgipa chaka ronggniko salgipa garirang ong·enga, jeon je biaponi je ramaoniba aro je somoioba manderang ong·katpretbaia aro napsrukaia aro ian bang·a changnan indakgipa a·selrang ong·enga aro ia chaka ronggni gari an·chengoba ong·bo ba to ga·ake donggipa ramao solprake ga·akaia ine chaka ronggniko gariko salgiparang aganangaha.
