TURA: South Garo Hills-ni Chokpot Block-ni ning·ogipa Gongganggre songo Dareng chibimako dolong kabatna gita Chokpot MLA aro Meghalaya Commission on Resource Mobilization-ni Chairman, Sengchim N Sangma adita salrangna pangchakaniko songe on·aha.
Ia dolongko mittar 75 chue, kror 4.79 tangka paisarangko koros ka·e rikgen. Ia chibimako dolong kabatjani a·sel, a·jolni manderang kending kending dakenba gitchambegipa dolongko malbate re·na gita nangenga, jean kenchakbeani ong·engahachim.
Ia dolongko rikna gita Gongganggre, Dangilgre, Dagalgre,Kemranggre, Tebilgre aro Asimdikgre ia songbongani VEC-rang krenge ja·ku de·chakataha, jemangan MGNREGA aro Meghalaya Basin Development Authority (MBDA)-ni Viability Gap dakgipa scheme-rangchi kam ka·na gita tariaha.
Ia dolongko kamanjokode, a·jolo songdonggiparangna, skulrangchi, health centre-rangchi re·na aro uamangni game ge·e man·gimin bolam bite-rangko anti-bajarrangona ra·e chile palna gita namen dakchakbeani ong·gnok.
Dolong rikna gita pangchakaniko songe on·ani somoio, Deputy Commissioner S Awasthi, Chokpot BDO Senfield Ch Sangma, DRDA Project Director P R Marak, DPM, MBDA/MBMA, B Ch Sangma aro gipin official-rangba dongpaaha.
