TURA: West Garo Hills, Garodubi songoni Fair Price Shop dealer-ni kam ka·ako tik ong·ja ine ua songni headman ba nokma matnangaha, indiba ua an·tangni kosako matnangako kakket ong·ja ine aganchakataha.
Mijaomangmang gital seoka man·gipa nokma Islam Hoque Choudhury, Fair Price shop-ni dealer Baharul Islam-ko ia bilsi 2023 February jaoni June jaonan NFSA-ni gita PDS rice ba merongko ong·gija dona, beneficiary sakprakonikon ata kg merongko ra·rika, una agreba sianggipa bon·anggipa beneficiary-ni bimingrangko NFSA list-oniko ra·galja ine matnangaha.
Uandake an·tangni kosako matnangani gimin talatengon Baharul Islam, indine aganataha, “Choudhury-ko Garobudi songni gital nokma seokani adita salrang ja·manan ua an·tangna quintal 2 merong aro gong 20,000 tangkako dabiaha. Uni dabiako on·na jechakani gimin July 13 tariko ua angko phone ka·ate ka·mikkenataha. Aro angni kosako ong·gija kattarangko gipataha.”
Iarangni gisepon Baharul, uni kosako matnanganiara kakket ong·ja ine talatanio sakkirangko on·aha.
Baharul-ni gita, Islam Hoque Choudhury-ko uni cha·bokani kamrangna u·itoka, bilsi 2021-o uko Meghalaya Lokayukta -ni ge·etanio adita jana pattoko donataha.
