Tura: Achik Conscious Holistically Integrated Krima (ACHIK)-ni Tura-o okumu chake jingjengatani Mongolbar salo sal 8 gapgenchimoba, Chief Minister Conrad Sangma-oniko ka·donganiko kattako man·kuja dipetnade jingjengataniko dontongjawa ine aganaha.
ACHIK, gipin NGO-rang baksa bakrime job roster system-ko name dake nipiltaie ra·gatchina aro Tura-ko Winter Capital songchina dabie jingjengatenga.
“Chingni nangnikako dabie jingjengatanio sorkarini maming dakeba simsakgijako nikede, ta·rake aganchakaniko man·gen ine ka·donga dongja. Indiba chinga dontongjawa, jegitaba somoi ong·angkan, chingni dabianina aganchakja dipetde jingjengatangkugen, ine ACHIK-ni dilgipa saksa dilgipa Laben Ch Marak aganaha.
Jingjengatako a·bachengataonin authority aro sorkarioni saksamangba sing·e nirokea dongja indiba Sombar salo jingjengatani sal 7 gapao West Garo Hills-ni Deputy Commissioner Jagdish Chelani, re·bae, jingjengatako dontongchina mol·molaha aro Chief Minister-ko grongna mikkang antiona sengna nanggen ine aganaha. Indiba jingjengatgipa CM-oniko ka·dongataniko man·kuja dipetnade dontongna jechakaha.
“Ian chingni dolsa ba dolgni organisation-ni jingjengatanisan ong·aijaha, indiba Garo Hills a·jani manderang gimikni apsan re·mikkangani ong·skaha. Garo Hills a·jana mikkanchina chingni dedrang su·drangnasa chakatenga. Garo Hills a·jani bang·an chingna chakpaengani gimin da·ode chinga dontongjawajok, chu·sokatesa dontelgen. Manderang chingko baditan ka·donge nidoenga, uko be·atna man·jawa” ine ACHIK general secretary, Bernita Marak aganaha.
ACHIK dolni jingjengatako niamgri ba niam ong·ja ine DC-ni agananina, jingjengatgipa dolrang, “chingni tom·tome jingjengataniara maidake niamni kosako ong·aha? ine sing·ataha.
“India-ni Constitution, Art 19 a, b aro c-o tom·tome jingjengatna bilko on·aha. Uo pangchake sorkarini ja·ku de·aniko namnikgijako parakna bil donga. Chingni jingjengatako a·bachengaonin da·ona salsamangba golmal ong·a dongja, maio pangchake jingjengatako niam gri ong·a ine agana man·a? ine Bernita sing·ataha. Bernita an·tangba law-k practice ka·gipa ong·a.
Chingni ja·ku de·anio politics-ni gita miksongani dongja, indiba chinga mikkangchi nambata salko man·a ka·dongesa tom·tome jingjengatenga.
“Garo Hills-ko Winter Capital songode, development-rang sokbagen. Da·ode chinga je kamnaba Shillong-ona re·na nangaia, jekon gimikde koros man·ja. Winter Capital-ko man·ode neng·nikarang komigen,” ine Laben aganaha.
Chinga darang community ba dolni kosako ong·ja aro jemangan kamko man·aha, uamangni kamko ra·sekna ba bon·atna miksonga dongja. Bilsi 100-ba ong·china, batanggimin sal somoirango chingni man·a nanggnirangko jekon man·rikjaha, uko ka·sinsin gapatoba ong·aigen. Garo Hills-oni darangba, kam man·giparangoniko ra·sekna miksongja, ine ACHIK, talataha.
Iarangni gisepon BJP Mahila Morcha-ni president-ba ACHIK aro gipin dolrangni apsan ong·e re·mikkanganio bakrimchina mol·moltaha. Ua an·tangba mnisaloni jingjengatao bak ra·paha.
AAYF president, Salsam Marak-ba gipin NGO-rangko mikkangona re·bae chakpachina aro CM Conrad Sangma-ko mol·molchina didiangaha.
“Na·an a·doko dilenggipa ong·ani gimin chingni pagipa gita ong·a. Na·an chingko nirokatgen ine chinga nang·on ka·donga,” ine Salsam aganaha.
