SHILLONG: Bihar a·dokni ja·mande Meghalaya a·dokan India a·song gimiko kangalbatsranggipa ine Niti Aayog-ni parakani ja·man, a·dokni manderang namen dongsiksakaha aro kangal cha·asianiko bon·atna aro a·dokko namroro-silroroatani cholrangko dakchina gita Sorkariko nangnikaha.
India a·songni gisepo gnigipa kangalbatsranggipa a·dok ong·enga ingipa report-ni bidingo aganengon, ia report-ko chong·motgipa datao pangchake tariaha ong·ode, ian Meghalaya Sorkari, songdonggiparangko ja·manchakatani ong·gen, dolsa NGO dilgipa Robertjune Kharjahrin aganaha.
“A·dokni manderangni janggi tangani gadangko ra·dona gita jakkaltogipa aro niksamsoani grigipa sorkariko rikna ja·manchakani gimin ong·aha. Unigimin an·ching, namgipa, niksamsoani gnanggipa aro cha·bokani grigipa dilgiparangko seokna mikrakna nanggnok, ong·jaode mikkangchi namjabataona sokanggen,” ua aganaha.
Saksa Retired Police officer, M Kharkrang uandake dingtang dingtang niksenggipa a·dokni manderangba Meghalaya a·dokni ja·manchakanina suk ong·gijanirangko paraktokaha.
Bihar a·doko kangal-cha·asigiparang da·omiting 37.21% ong·engon, uamangni ja·mande Meghalaya-an gnigipa ong·enga, jeon A·doko 31.3% kangal-cha·sigipa manderang donga. Ia a·dok damgni ja·mano, Uttar Pradesh (30.03%), Jharkhand (29.75%) aro Arunachal Pradesh (22.21%) ong·enga ine National Family Health Survey-5 (NFHS-5)-o pangchake NITI Ayog parakataha.
