TURA: Meghalaya Health and Family Welfare Minister, Ampareen Lyngdoh-ni Tura-o ACHIK aro gipin NGO dolrangni Winter Capital-na dabianiko knachakna nangja ine agangipa kattana gitcham MCS officer Laben Ch Marak, Butbar salo aganchakataha. ‘Ampareen-ni Tura-na Winter Capital-ko on·na dabianiko ra·chakna man·ja ba knachakna nangja ine agananiara bilgriako mesoka.’
“Uni agangipa kattarangara jingjengatgiparangni gisikko namen ding·atgipa ong·a, Iandakgipa kattako aganao maidakgipa obostarang ong·naba gnang ineba chanchigijaha. Uni kattara gisik saatgipa ong·a. ‘Meghalaya-ko ma·eke donggipa district-rang ong·a ine Ampareen-ni agangipa kattara kakket ong·ja. Uni pa·sikaniara bilgrigipa ong·a,” ine Laben aganaha.
Hill State Movement-ko Garo-rangsa a·bachengdilaha aro manderang una dakgrikaha, a·doko apsangrik development-ko man·a jinma apsan ong·e re·mikkangaha. Gimikni dabianirangko knachake donga ong·ode, gipin district-rangba apsankon dabigen’ ine agangipa kattara manderangko dilsreta gita ong·enga.
“Tura-na Winter Capital-ko on·node gipin district-rangba apsanko dabigen’ ine uni agangipa katta, manderangko dilsretgipa ong·an baksa kraa ong·ja.”
Una agreba Ampareen, jingjengatgiparangko chonike aganaha ineba Laben agankuaha.
“Chief Minister grongna re·angao haida chanchiarang dingtangnaba donga ineba aganaha, ia kattani ortoara maia? Bang·a jinma manderang indinsa kamgri ong·e maming miksonga ba chanchia donggija somoiko re·ate dongengama? ian dal·bea chonikani ong·a, uni kattako nipilna nanga,” ine Laben aganaha.
