SHILLONG: A·doko ru·uta somoirangna bijolina neng·nikako man·ani gimin a·dok sorkari, Myntdu Leshkya Hydro Electric Project (MLHEP) aro Kynshi power project-ni gnigipa phase ba bakko a·bachengna chanchiengjok.
Butbar salo kobor ra·timgiparang baksa agangrikmitingo MeECL-ni MD Sanjay Goyal, indine aganataha, “ia ge·gni hydro project-rangko ru·uta somoinan matchotgija dongenga, jekon sorkari, a·bachengtaina chanchiaha. MLHEP, Kynshi project aro gipin chonchongipa project-rango kam ka·na chanchiaha.
Ia project-rangna sandianiko dakaha. Corporation, MLHEP-ni gnigipa bakni DPR-ko tarianio matchotnasiengjok. MeECL, project-ni 2nd unit-o 70 MW capacity-o unit ge·briko tarina miksongenga.
“DPR-ko taria matchota ja·mansa, project-na badita tangka paisako jakkalna nanggen aro banoniko tangkako jakkalgen, iarangni gimin chanchigen.”
Kynshi power project-ni gimin niatgenchimode, project-ni skanggipa bakko matchotatna man·jaha, uni gimin corporation gipin cholrangko sandiskaenga ine Goyal aganaha.
West Khasi Hills-ni Sangriang Mawpon jolni a·a nokgipa, Kynshi hydro power project-ni kamko a·bachengatanio ru·utani gimin suk ong·gijako parakataha.
Minggipin MeECL, mijaomangmangsan a·doko hydro power project-ni gimin study ka·na ba sandianiko dakna NTPC baksa MOU-ko soi ka·aha.
