Shillong: A·dokona manderangni napsrukbae songdong-a·chaanirangko champengani cholrangko ra·gatenba Khasi-Jaintia Hills-ona railway-ko ra·bagenchimode songdonggipa manderangna namen namgni ong·genchim ine Sorkarini Adviser Chief Adviser, Lahkmen Rymbui mijalo aganaha.
“Bebegita Ma·mong Sorkari a·doko ILP-ko ra·gate on·ani ja·man railway-ko sokatbaode a·dokni economy namen tang·dogenchim” ineba Rymbui aganaha, jean gitcham sorkario Home Minister ong·achim.
Ma·mong, skang 1980 bilsionin Byrnihat-ona railway-ko ra·bana gita mangsongahachim ineba Rymbui gisik ra·ate aganaha.
Indake ong·genchimoba, a·palchini manderang a·dokona napbaenba a·doktangni manderangna neng·nikaniko ra·bagen ine kenchaksoe railway ra·baaniko jegalsoani giminsa ia kamrang da·alonaba be·en pil·na man·kujaenga, gitcham Home Minister aganaha.
Railway-ko ra·bagenchimode mongsongbate game ge·e cha·giparang namgniko man·batgen iako darangba jena man·jawa, maina bosturangko salruraanio altugen aro korosrangkoba komiatgen ine Sorkarini Chief Adviser aganaha.
“Indiba railway-ko ra·baode Sorkari mingsana namedake kam ka·skana nanggen, chong·motan a·dokna aro uni manderangna neng·nikani sokbana nangjwa,” Rymbui aganaha.
A·dokona napdrabae songdonggipa manderangko champengsoani mingsade ILP-an ong·a ine aganengon, a·palchini manderang songdongkamna man·jana gita Dorbar Shnong dakgipa traditional institution-rang namekae nirokna nanggen, ua aganaha.
Uni aganani gitade, district council-rangoniko trading license-rangko man·gijade non-tribal-rang a·doko bading chiwalaniko dakna man·ja ine United Khasi-Jaintia Hills District (Trading by Non-Tribals) Regulation, 1954-o segatgimin donga.
Tribal-ni bimingo darang non-tribal-rangba maming bading-chiwalaniko dakna man·jawa ine Meghalaya (Benami Transaction Prohibition) Act, 1980-o champenggimin donga ineba ua aganaha.
“Napdrabagiparangko champengna gita an·ching MRSSA-ko tik ong·e ja·rikna man·gen. Indiba ILP-ko ra·gata ong·ode bilakbatgipa ong·gen,” Rymbui agandapaha.
