Tura: ACHIK-ni dilani Garo Hills-ni dingtang dingtang NGO-rangni nangrime Winter Capital-na dabienggipani bidingo health minister, Ampareen Lyngdoh-ni aganchakgipa kattarangna ding·chaoenba mijalo uni Garo Hills-ona sokangao Turao songdonggiparang, Circuit House sepango dongsoenba, Minister-ko Go Back, Go Back ine chrik a·boksotokaha.
Unaskang, Turako Winter Capital-na ACHIK-ni dabianiko knachakna nangja ine Health Minister aganahachim, jeni gimin A·chikrangni gisepo namen ding·chaotokaha aro warachakattokaha. Unomitingo Winter Capital-na dabie ACHIKni okumu chakani mijalming sal 10 gapengaha aro dontongna maming miksongani dongkuja.
Cabinet minister Garo Hills-ona salgittamna wenangengon, mijalo ua North Garo Hills-o napangchengaha. Ua Baghmara-ona re·angna skang da·al sana banani a·bakuni bidingo Turao chanchirimaniko dakanggen ine ka·dongenga.
Lyngdoh-ni Tura town-ona sokbaenga ine ma·sisoenba, bang·a songdonggiparang Circuit House sepango dongsotokaha, jeon ua waltuani ong·achim.
