SHILLONG: Tura-ko winter capital songchina dabigipani bidingo Meghalaya Chief Minister Conrad Sangma, da·o dipetode mamingkoba ku·rachakani gri dongenga.
Winter capital-na dabienggipani bidingo aganengon, ua uni Garo Hills-ona re·angao ACHIK memborrangko gronggen inesan Chief Minister aganaha.
Roster system-na dabigipani bidingo aganengon, Sangma aganaha je stakeholders ba daito ra·e kamrangko ka·gipa dolrang baksa agangrikanirangko dakani ja·mano Sorkari, iani bidingo chanchie tik ka·aha aro chanchianirangko, ACHIK-ko man·chape dolantinan u·iatanirangko on·aha aro manderang bak ku·mongrimani ja·man Sorkari, Office Memorandum-na re·chakataha.
“Ra·pilaniko dakna aro uko nina gita chingna neng·ani ong·a,” Conrad aganaha.
Winter capital-na dabiani gimin aganengon, namroro-silroroaniko ra·bana gita Sorkari pangnan pilakchikon nigrikanirangko daka, CM aganaha.
“Turao chinga mini-Secretariat-ko songaha. Ian dal·begipa ja·ku de·ani ong·a aro mini-Secretariat-ko uno donani gimin chinga uamangni talate on·gen, unagreba dal·a dal·a kamrangko aro aro administrative reform-rangko dakangkugen aro scheme-rangko sokatanio aro administration-ni a·bao nambatatanggen,” ua aganaha.
Unomitingo, Turao Governor House-na kam ka·anirangba matchotnasiengaha ine janape aganengon, uakoba da·oni financial year-on bimang ong·atgen ine aganan baksana kam ka·anirango pilakni gitan nambatatna gita bang·a department-rangkon bilakbatatengaha ineba ua agandapaha.
“Chingni miksonganian, pilak namgnirang manderangona sokchina aro sasonni bilo manderangko sepangbatatna ong·a,” Sangma aganaha.
Ua indakeba aganaha je nangnikanian administration-ko sepangbatatna inesa ong·a, changsano gimikko dakna man·jaoba dakgnirang bang·en dongkuenga.
Bilrangko ma·sina gita nanggen, administation-ko manderangona sepangbatatna gita sorkari krengen kam ka·enga, a·dokni pilak manderangni namgninan sorkari on·kange kamrangko ka·enga, CM aganaha.
