Nongpoh: Assam aro Meghalaya-ni dilgiparang Sonibar salo Assam State Guest House, Koinadhara-o damgni a·songni gisepo meligrigijagipa sima ari jolni bidingo chanchirimna joint meeting-ko ka·angaha. Jeon dolgni a·dokonin mongsonggipa representative-rang dongpae chanchibewalanio bak ra·angpaaha.
Meghalaya-oni Regional Committee-ko Deputy Chief Minister Prestone Tynsong, dilangaha. Meeting-o bak ra·gipa committee-ni memborrangara- Jirang MLA Sosthenes Sohtun, Mawhati MLA Charles Marngar, Umroi MLA Damanbait Lamare, Khasi Hills Autonomous District Council-ni Chief Executive Member Pyniaid Sing Syiem, Ri Bhoi -ni Deputy Commissioner Arpit Upadhyaya, aro gipin officer-rang bak ra·angtokaha.
Assam-oni dolgni Regional Committee bak ra·angaha. Agriculture Minister Atul Bora aro Forest & Environment Minister Chandra Mohan Patowary- uamang an·tangtangni team-ko dile meeting-o bak ra·aha. Dolgni a·dokni committee-rang sima ario meligrikgijaniko namatna miksonganio agangrikangaha.
Deputy Chief Minister Prestone Tynsong, meeting matchote, kobor ra·timgiparang baksa agangrikmitingo, sima arini bidingo agan-golpogrikanio baditana chu·sokani ba bite gnanggipa ong·ani gimin parakaha. Meetingo mongsongbate damgittam biaprang- Desh Domreah, Nongwah Mawtamur aro Borduar sector-ni gimin agangrikaha.
Resolution process ba kamko ta·rakbatatna, Meghalay aro Assam dolgnini Deputy Commissioner-rangko jajrengbatani donggipa biaprangko sandichina ge·etaha, indake mikkang ja August 25 tariko apsan biapon tom·taina tik ka·aha, jeon dolgni a·dokoni official-rang sandie man·gipa report-o chanchirimgen ine Deputy CM Prestone Tynsong, aganaha.
Indake ong·engon Deputy Chief Minister Prestone Tynsong, sima arini bidingo agangrikaniko a·bachengani gnigipa bako ja·ku de·na tarisoani bidingo talataha. Sima ario meligrikkugijagipa biaprangni bidingo tom·tomatna kam ka·angna gita batanggimin May 24 tariko damgni a·dokni Chief Minister-rang gronggrikaha.
