TURA: Re·anggipa Sombar salo, Tura-ni CMO ba Mini Secretariat-o dingtang dingtang dolrangko Chief Minister Conrad K Sangma-ni gronge agangrikengmiting somoio rang·gitik so·sojengjeng ong·anganichi a·dokni Chief Minister aro tom·anio bak ra·gipa pilak manderangni janggirangna kenchakna nanganiko ong·atahani gimin a·dokni Director General of Police (DGP) Lajja Ram Bishnoi aro West Garo Hills a·jani Superintendent of Police (SP) Vivekananda Singh Rathore-ko suspend ka·china ba kamoniko dontongatchina gita Meghalaya a·dokni Trinamool Congress (TMC) dabiangaha.
Ia so·sojengjeng ong·aniko High Court-ni nirokanio jakgitele sandirokchina gitaba TMC dabiangaha.
TMC-ni parakatani gitade, Mongolbar salo DGP-ni media-na press conference-o parakatanian ia a·sel ong·anio police department-ni chu·sokgijaniko aro kamo olgrokaniko mesokaniba ong·ahachim.
“Ia so·sojengjeng ong·aniara Chief Minister-ko chadrapna miksongmanchae dakanisa ong·achim ine DGP an·tangan media-na parakaha aro ian so·sojengjeng ong·atgipa manderangni chanchisamsoaniko ma·sina gita police department-ni chu·sokgijaniko mesokani ong·aha. DGP LR Bishnoi-ni ning·o police-rang, Chief Minister-ni jangginasan ong·aigija Tura CMO-o tom·e bak ra·gipa pilak manderangnan kenchakna nanganiko ra·baaha,” ine TMC parakataha.
Cabinet Minister Ampareen Lyngdoh-ni Tura-ona re·bana skang manderangni ka·a ding·chaoanikoba police department, gisik nangbree ra·jaha aro social media-rango manderangni MLA-rangko matnange seanirangkoba dal·e ra·jaha gita ong·aha ineba TMC matnangataha.
“Ian police department-ni so·sojengjeng ong·na chol on·aniko mesokanisa ong·aha. Ia a·selna dosgri manderangko, me·chikrangko, joltangni dilgiparangko, political dolrangko aro NGO-rangkoba biming man·atna gita jotton ka·anirangko nikna man·enga,” ine TMC parakataha.