SHILLONG: Salgnina Shillong songjinmani Rilbong-o donggipa Meghalaya Legislative Assembly-o on·atanggipa Commonwealth Parliamentary Association (CPA) India Region-Zone-III-ni chang 20-gipa Annual Conference ba bilsini tom·bimonganiko Lok Sabha-ni Speaker Om Birla, a·bachengate on·angaha aro ia tom·bimonganiko a·bachengatanio Meghalaya a·dokni Chief Minister Conrad K Sangma, Rajya Sabha-ni Deputy Chairman Harivansh Narayan Singh, Meghalaya Legislative Assembly-ni Speaker Thomas A Sangma, Arunachal Pradesh Legislative Assembly-ni Speaker aro CPA India Region Zone-III-ni Chairman Pasang D Sona baksana gipin dilgiparangba bak ra·angtokaha.
Ia CPA India Region, Zone III-ni tom·bimonganiko a·bachengatanio Lok Sabha-ni Speaker, jinmana aganprakangengon, ian salgro salaram jolrango ong·telaigipa a·selrangko champengna gita chanchirimna namgipa chol ong·enga ine janapatenba, ia salgnina ong·atenggipa tom·bimonganio, salgro salaram jolrangko nangdimatani aro ong·telaigipa a·selrangko champengani bidingo delegate-rang chanchirimanggen ine parakataha.
Lok Sabha-ni gitcham Speaker aro Meghalaya a·dokni gitcham Chief Minister Purno A Sangma sagini kamrangko gisik ra·atpilengon, uni Parliament-o daka rikanirangna aro democracy-na on·gilaniko pangnan gisik ra·gen ine Birla parakataha.
“A·gilsakni pilak biaprangon climate-ni dingtanganiko an·ching nikna man·enga aro ia climate-ni dingtanganichi an·chingni chagrongna nangenggipa neng·nikanirangko champengna gita ia tom·anio delegate-rang chanchirimna cholrangko man·gen,” ine Birla aganaha.
Salgro salaram a·dokrangoba gipin a·dokrango namroro silroroani gitan cholrangko man·paengaha aro da·o namroro silroroani ramakon re·engaha ineba Lok Sabha Speaker parakataha.
Ia conference ba tom·bimonganiko ong·atanian mikkangchi salgro salaram a·dokrangni re·mikkanganiko tarina dakchakani ong·gen ine janapatengon, Prime Minister Narendra Modi-ni dilanichi salgro salaram a·dokrango pilakni gitan namroro silroroaniko nikna man·engaha ine Birla parakataha.
Salgro salaram a·dokrangoba a·songni gipin mongsonggipa bakrang baksa apsan ong·atna nangengani gimin janapatskaengon, salgro salaram a·dokrango ka·enggipa PM Gati Shakti, salgro salaram a·dokrango National Highway ramarangko apalbatatani, UDAN scheme-ni ning·o airport-rangko kulidape chalaiani aro uandakgipa dingtang dingtang scheme aro project-rangni gimin Birla agan-talate on·angaha.
Manipur a·doko ong·enggipa obostarangna an·tangni suk ong·gijaniko parakangengon, “Tom·tomanisa namroro silroroani ramade ong·a aro anga salgro salaram a·dokrango tom·tomaniko rakkichina mol·molenga,” ine Birla parakataha.