SHILLONG: National Education Policy (NEP) 2020-ko ra·gatanichi Meghalaya a·doko drop-out rate ba poraia dontonggiparangni batroroenganiko komiatna dakchakgen ine North Eastern Hill Universitty (NEHU)-ni Vice Chancellor Prof Prabha Shankar Shukla parakataha.
Shukla-ni parakatani gitade, da·o dipet Meghalaya a·doko poraia dontonggiparang 10 percent-mangni gita ong·engachim indiba NEP 2020-ko ra·gatgenchimode iandake porai dontonganirangko komiatna dakchakani ong·gnokchim.
Meghalaya a·doko drop out rate-ni tang·doenganiara namen jajrengna nangani ong·enga ine janapatengon, NEP 2020-o chatro chatrirangko napa ong·kata dakna cholrangko on·ani gimin ian chatro chatrirangna, je bilsioba chubata gadangrango poraipiltaina cholrangko on·gen aro Academic Bank of Credit (ABC)-ni dakchakanichi uamangni record-rangkoba digital-chi see rakkigen.
NEHU-o 2022-23 bilsini academic session-na Post Graduate (PG)-rangnade NEP-ko ra·gatmanaha ine talataniko on·angengon, Under Graduate (UG)-rangnaba ia 2023 bilsini August 1 tarikoni a·bachengenggipa academic session-na NEP-ko ra·gatna gita, NEHU-o bak ong·enggipa pilak college-rangna chittirangko seatmanaha ine NEHU-ni Vice Chancellor parakataha.
“Ia gital Education Policy-chi Meghalaya a·doko lekka porako tang·doatna gita mongsonggipa kamko ka·gen,” ine Shukla parakataha.