TURA: Adita salrangna skang, Tura-ni Mini Secretariat sambao so·sojengjeng ong·anina rim·ako man·gipa mitam chadamberangde college-rango poraienggipa chatrorangsa ong·achim ine Garo Students Union (GSU) suk ong·gijaniko parakatenba, ia chatrorangni mikkangchina chanchienba nanga gita dakchakanirangko on·china a·dokni Chief Minister Conrad K Sangma-ko didiataha.
GSU-CEC-ni president Tengsak G Momin-ni Chief Minister-na sedoatgipa chittio parakatani gitade, ia a·sel ong·anio rim·ako man·gipa sakdok chadamberangde dingtang dingtang college-rango poraienggipa chatrorangsa ong·achim aro uamangoni bang·batan ua somoio dingtang dingtang a·selrangchisa rim·ako man·ahachim.
“Ia chatrorang da·o dambemitingsan ong·kuenga aro an·tangtangni janggi tanganiko tariengmitingsa ong·enga. Iandake gisik dambemitingko rim·aniara uamangni gisikrango dongtogijaniko ong·ate uamangni mikkangchi janggi tanganiko nosto ka·ani gita ong·gen,” ine Momin parakataha.
Ia a·sel ong·anio rim·ako man·gipa Ringgi Songgital-oni Silseng Ch Momin minggipa mandeni gimin janapatskaengon, ua somoio uni motorcycle tyre puncture ong·ani giminsa ua an·tangni motorcycle-ko FCI Godown sambao donggipa Nazing Bazar ramao donangahachim indiba rang·gitik ua somoio garirangko so·enga ine ua knasoahani giminsa Ringgigre Songgital-o an·tangni steel fabrication dokkano kam ka·enggipa welding technician Lasbert M Marak minggipa mandeko rime, uni donanggipa motorcycle-ko sikdubaengmiting somoio uamang sakgnikon police-rang rim·aha ine GSU-ni president parakataha.
“Ia manderang indinari rim·ako man·giparangsa ong·ani gimin uamangko maming a·sel nanga gri jakgitel watpilna nanga,” ine Momin parakataha.
Social media-rango post ka·ani gimin mitam manderangko rim·anina suk ong·gijaniko parakatskaengon, jakgitele agananiara India a·songo songdongenggipa mande sakantini bilan ong·a aro social media-rango seataiani gimin rim·anide kraani ong·ja ine GSU-ni president jegalataha.