SHILLONG: Da·o dipetode Shillongo ge·gipin state university-ko kuliani dongkujawa ine Meghalaya Sorkari parakaha.
Shillong ge·sa state university-ko kulichina dabiani bidingo aganengon, State University, mongsongde ru·uta bilsirangonin dongna nangahachim ine Chief Minister Conrad Sangma aganaha.
Meghalaya-ni skanggipa State University – Captain Williamson Sangma State University, skanggipa bakna uni campus ba office, Shillong-oba donggen ine aganan baksa, da·o dipet ge·gipin state university-ko kulidapani giminde sorkario maming miksongani dongjaenga ineba Pa Sangma talataniko on·aha.
Ua indakeba aganaha je university-ko kulianio tangka paisani gita bilongen nangchakeani donga unigimin ge·sa state university-ko kulidapna skang, sorkario bang·a gipin nirokna nanganirang dongkuenga, chief minister aganaha.
“Chinga da·o donggipako chalaichengna nanggen, uni ja·mansa haide an·ching gnigipana chanchina nangnaba donga. Skanggipako bilakatchenge nina, uni re·mikkangani maidake ong·gen nienba re·mikkangna, je biapo nange nika uandakgipa a·dokni gipin gipin biaprango campus-rangko rikna, uni ja·man gnigipana re·mikkangna,” Pa Sangma agandapaha.
