TURA: Adita salrangna skang, Tura-ni Mini Secretariat-o ACHIK, GSMC aro uandakgipa dingtang dingtang dolni dilgiparang baksa Chief Minister Conrad Sangma-ni tom·e chanchirimengmiting somoio manderangni jinma chadrape so·sojengjeng ong·atani a·selko ma·sina gita Magisterial Inquiry-ko dakengahani gimin inquiry-ko matchotahaon ia so·sojengjeng ong·ani ja·pangko pilakan ma·sina man·gen ine Bristibar salo, West Garo Hills a·jani Deputy Commissioner Jagdish Chelani parakataha.
Ia so·sojengjeng ong·gipani bidingo Deputy Commissioner-ni agananiara, adita salrangna skang Director General of Police (DGP) LR Bishnoi-ni agangipa kattarang baksa meligrikja ine songbadrango seahani gimin DC, ia kattarangko jinmana parakataha.
Tura-o so·sojengjeng ong·ani ja·man kobor ra·timgiparangna talataniko on·angengon, ian Chief Minister-ko chadrapna miksongani gnang chanchisamsoe dakanisa ong·aha ine a·dokni DGP aganahachim. Indake ong·genchimoba, West Garo Hills a·jani Deputy Commissioner-ko news channel ge·sao interview ra·anio ua, ia a·sel ong·anio maming chanchisamsoe dakani dongja ine a·kangatskaahachim.
Iani bidingo talataniko on·angengon, ian so·sojengjeng ong·daldalmiting somoio ka·gipa video-sa ong·achim aro ua somoio ua an·tangni ma·siani gitasa aganaiaha indiba DGP-ni agangipa kattarangko jegala ong·jachim ine Deputy Commissioner Jagdish Chelani parakataha.
“Tura-o so·sojengjeng ong·gipani bidingo DGP-ni agangipa kattarangko anga jegala ong·ja ine anga talataniko on·na ska. Ia so·sojengjeng ong·gipani bidingo police-rangba ning·tue sandirokanirangko dakenga aro magisterial inquiry-koba dakengani gimin manderangna sakkirangko mesokna man·gen,” ine Chelani parakataha.
Ia so·sojengjeng ong·gipa obostani bidingo kakketko mesokna aro kakket bichalko ra·bana gita DC office-ba on·kange kamko ka·enga ineba Deputy Commissioner parakataha.