SHILLONG: Meghalaya a·dokni bang·bata nurse-rangan kamrangko man·jaengani gimin aro mitamranga bang·gija dormaharangnasa kamrangko ka·na nangengani gimin gipin a·songrango kamrangko ka·na sikenggipa nurse-rangna a·dok sorkari, Sukrobar salo dingtangmancha Overseas Nursing Job Fair-ko Shillong-o ong·atangaha aro ia job fair-ko ong·atanio dingtang dingtang a·songrang, jekai Japan, Singapore, Germany, Middle East, Australia aro uandakgipa a·songni company-rang, an·tangtangni kamrang aro cholrangko mesoke on·angtokaha.
Ia Overseas Nursing Job Fair-ko, Meghalaya State Skill Development Society aro Meghalaya sorkarini Health & Family Welfare department, Navis HR Pvt Ltd, Nursedge aro Trained Nurses Association of India baksa bakrime ong·atangaha aro ia job fair-ko ong·atanio a·dokni Chief Minister Conrad K Sangma, jinmana aganprakangengon, a·dokni train ka·ako man·gipa nurse-rangna dingtang dingtang a·songrango kamrangko man·na gita a·dok sorkari, dakchakanirangko on·na jotton ka·gen ine ku·rachakaniko on·angaha.
Kamrangko ka·na gita ua kamni gimin ma·sigipa aro changgipa sapgipa ong·na nangchongmota ine janapatengon, gipin kamni a·barangoba sorkari, ia apsan dakgipa cholrangko on·na miksongenga ine Chief Minister parakataha.
“Tribal-rangni iandakgipa bamani bewalrangan Meghalaya a·doko kam ka·na changgipa manderangko ong·katatenga. Manderangni changa sapanirangko namgipa gadango ra·dona gita sorkari, doka dam·ani, an·seng baljokani, nokrangko rikani aro uandakgipa dingtang dingtang kamni a·barango cholrangko sandie on·gen,” ine Chief Minister aganaha.
Chief Minister-ni parakatani gitade, jagnini gisepon a·dok sorkari, medical recruitment board gita sak 500 doctor-rangko kamo ra·na man·aha.
Gipin a·songrango kamrangko man·ahaon nurse-rang an·tangtangni kam aro changa sapanio pangchake japrakon gong lak 1.2-oni lak 2-mangona dormahako man·ani donggen aro uamang gong 80,000-oni gong lak 1-mangkode Meghalaya a·doko dongenggipa an·tangtangni nokdangrangna watatskana man·gen ineba Chief Minister parakataha.
Gipin a·songrangoni re·bagipa company-rangni seokgimin candidate-rangna pilak nanga dakchakanirangko aro training-ni korosna sakprako gong 50,000/- ka·e on·na gitaba sorkari ku·rachakangaha. Bangki korosrangkode ia candidate-rang kamrangko man·ahaon, uamangni dormaharangoniko kattiskana gita sorkari tik ka·angaha.
Ia Overseas Nursing Job Fair-ko ong·atanio a·dokni Health Minister Ampareen Lyngdoh-ba dongpae jinmana aganprakangengon, nanga gita training-rangko ra·ani ja·manba kamgri ong·e dongna nangenggipa manderangna dakchakanirangko on·na gitasa sorkari, iandakgipa program-rangko ong·atenga ine parakataha.
Ia job fair-ko ong·atanio Garo Hills-oniba sak 150-mangni gita nurse-rang register ka·e bakko ra·angahaoba, Garo Hills-ni gipin nurse-rangnaba apsan dakgipa cholrangko on·na gita sorkari, ia apsan overseas nursing job fair-ko Tura-oba ong·atanggen ineba Health Minister parakataha.
