TURA: Dadenggre-ni block development officer (BDO)-na gipin biaponi IAS officer-ko watatani a·sel songni nokni manderang agangrikanirango aro dingtang dingtang kamrangko ka·anio neng·nikanirangko chagrongna nangtokenga ine Garo Students Union (GSU) Western Zone (North) Dadenggre parakatenba, ia BDO-ko ra·gale uni biapo A·chik ku·sik man·gipa officer-ko watatskachina sorkario dabiangaha.
GSU WZN Dadenggre-ni president Tengsan M Marak-ni parakatani gitade, Meghalaya a·dokni bilsi 53 ong·anio skanggipa changna gipin biaponi IAS officer-ko Dadenggre-ni BDO ong·na gita watatahachim indiba ia BDO, A·chik ku·sikko man·jani a·sel songni nokni manderangde neng·nikanirangko chagrongna nangtokskaengachim.
“Ia IAS officer-ko April 24 tariko jasanasan Dadenggre-ni BDO-na watatahachim indiba da·o uni BDO ong·e kam ka·ani jabri ong·pilengahaoba uko dingtang biapona ra·jitangkujaenga. Dadenggre Block-o bang·a songni manderangan A·chikkuna agre gipin ku·sikrangko man·jani gimin chingna joltangni officer-kosa nangbatenga,” ine Marak dabiangaha.
Garo Hills-o MCS officer-rang chu·onga gitan dongaha ine janapatengon, joltangni MCS officer-rangko BDO-ni kamna watatengon, kamtangko name ma·sina aro jolni nanganirangko ma·sie kamrangko ka·na man·na gita komibeoba bilsignide apsan kamon donna nanga ineba GSU WZN Dadenggre-ni president dabiangaha.
Ia dabianiko knachakjagenchimode GSU, sorkarini kosako jingjengatna draatako man·gen ineba ua mikrakataniko on·angaha.