SHILLONG: Tura-o GHADC-ni members’ hostel-ko rika matchotjani gimin National People’s Party (NPP)-ni MLA Sanjay A Sangma-ko man·chape gimik sak 12 manderangni kosako Meghalaya Lokayukta-ni charge sheet ka·gipani gimin Meghalaya a·dokni Chief Minister aro NPP-ni national president Conrad K Sangma, mamingkoba aganna gita jechakaha.
Iani bidingo sing·anina aganchakaniko on·angengon, “Ian judicial-ni kamsa ong·a aro da·o dipet ian kacharini jakosa ong·kuengani gimin anga iani bidingo mamingkoba aganna gita man·kujawa,” ine Sangma parakataha.
NPP MLA-ni kosako NPP-ni gita maiba ja·kurangko de·genma ine sing·aninaba aganchakaniko on·angengon, ian kacharini jakosa ong·kuengani gimin ua mamingkoba aganna man·jawa inesa Chief Minister aganchakaiaha.
Ma·mong sorkarini chamatgipa tangka paisarangko jakkalsretanina Lokayukta-ni charge sheet ka·ako man·gipa manderangara, Mahendraganj-ni NPP MLA Sanjay A Sangma baksana GHADC-ni gitcham chief executive membor (CEM) Denang T Sangma, gitcham MDC Augustine R Marak, gitcham MDC Brilliant R Marak, gitcham MDC Dipul R Marak, gitcham MDC Kurosh M Marak, gitcham MDC Winnison Ch Marak, gitcham MDC Dolly K Sangma, gitcham MDC Bhupendra Hajong, gitcham MDC Sukaram K Sangma, contractor Dolrich D Sangma aro GHADC-ni gitcham secretary Hewingson A Sangma ong·achim.
Tura-o gong 6,01,31,100 ong·gipa Member Hostel-ko rikani project-ko matchotjahani gimin Mahendraganj constituency-ni da·o ong·enggipa MLA Sanjay A Sangma aro gipinrangni kosako saksa Kingstone Bolwari Sangma minggipa mande, Lokayukta-na badi ka·doangahachim ine nikna man·a.
Ia tangkarangara, Schedule Tribe a·jarango namroro silroroaniko ra·bana gita 2015-16 bilsio Central Plan Scheme-ni Special Assistance-ni ning·o ma·mong sorkarini chamatgipa gong kror 100.71-ni bak ong·achim.
Lokayukta-ni ning·o donggipa Inquiry Wing-ni Investigation Officer/Member Anil Sangma-ni investigation report-o pangchake ia manderangni kosako Lokayukta, charge sheet-ko ka·ahachim.