SHILLONG: National Education Policy (NEP) 2020-ko ra·gatani bidingo North Eastern Hill University (NEHU)-ni vice chancellor Prabha Shankar Shukla aro Meghalaya College Teachers Association (MCTA)-ni gisepo meligrikgijanirang ong·engani gimin a·dokni gitcham MLA PT Sawkmie, an·tangni suk ong·gijaniko parakatenba, NEP 2020-ko ra·gatanio manderangni man·enggipa jajaanirangko namatna gita ta·raken ja·kurangko de·china a·dok sorkariko didiataha.
NEP 2020-ko ra·gatanio dingtang dingtang college-rangni gisepo meligrikjaenganina an·tangni suk ong·gijaniko parakatengon, poraienggipa chatro chatrirangni namgnina ta·raken chanchie nambatgipa ja·kukosa de·china gita Sawkmie, a·dok sorkariko didiataha.
“NEP 2020-ko ra·gatani bidingo chanchirimna gita academic council-ni tom·aniko ong·atchina skigiparangni mol·molaniko NEHU-ni vice chancellor, knachakna gisiko nangjaenga aro iana anga suk ong·jaenga. MCTA-ni seatgipa chittinade NEHU-ni VC aganchakaniko on·na nangachim,” ine gitcham MLA parakataha.
Iani bidingo college-ni skigiparang, non-cooperation movement-ko ong·atenganichi 1st semester-ni chatro chatrirangsa neng·nikanirangko man·skana nangengaha ineba Sawkmie suk ong·gijaniko parakataha.
NEHU-ni VC aro MCTA-ni gisepo agangrikaniko ra·bana man·na gita sorkari, ku·baltitimgipa gita kamko ka·na nanga ineba Sawkmie didiataha.
“Ong·jaode ia neng·nikaniko an·ching namatchipna man·jawa aro chatro chatrirangsa noksan ong·na gita nangaigen,” ine gitcham MLA parakataha.