SHILLONG: Mongolbar salo, West Khasi Hills Regional Committee-ni membor-rang, Assam a·doko Kamrup District Regional Committee-ni chairman aro Assam-ni Cabinet Minister Chandramohan Patowary baksa Assam a·dokni Kamrup a·ja ning·o donggipa Amingaon songo tom·aniko ong·atangaha aro ia tom·anio dolgni chanchirimenba, Assam aro Meghalaya a·dokni simarango meligrikna man·jaenggipa biaprang, mongsongbate Langpih jolrangko, re·baenggipa August 15 tarikni ja·man apsan re·ange nina gita manchie donangaha.
Ia tom·anio Meghalaya a·dokchipakni West Khasi Hills Regional Committee-ni chairman aro Cabinet Minister Paul Lyngdoh baksana Mawkyrwat-ni MLA Renikton Lyngdoh Tongkhar, Mawshynrut MLA Methodius Dkhar, MLA Remington Gabil, Rambrai-Jyrngam-ni MDC Bajop Pyngrope, MDC Gigur Pyrthong aro sorkari officer-rangba dongpae bak ra·angaha.
Ia tom·aniko ong·atani bidingo kobor ra·timgiparangna talate on·angengon, a·dok damgnini gisepo so·sojengjeng ong·enggipa biaprang aro mongsongbate Langpih jolrango meli nangrimgrikaniko aro tom·tomaniko ra·bapilna gita dolgnini gisepo tik ka·angaha aro iana a·dok damgnini regional committee-rangan, re·baenggipa August 15 tariko a·songni jakgitelani salko maniani ja·man, Langpih jolrangona re·ange nina gita tik ka·e donangaha ine a·dokni Cabinet Minister Paul Lyngdoh parakataha.
“A·dok damgnini regional committee-rangan August 15 tarikni ja·man apsan Langpih jolrangona re·ange, ua jolrango songdongenggipa manderang, jolni dilgiparang aro jatko dilenggipa manderang baksa agangrikna tik ka·aha,” ine Lyngdoh parakataha.
Ia tom·anio dolgni chanchirimgipa kamrangni gimin talate on·angengon, “Dolgnini gisepo agangrikani namen chu·sokgipa ong·aha aro dolgnini gisepon ma·sichakgrikani dongaha. Golmalrang donggijagipa biaprang, jerango songdongenggipa manderangan Meghalaya a·doko ong·na sikengachim, je manderangan Meghalaya a·doko voter ID card-rang dongachim aro je biaprangon Meghalaya sorkarini gita kamrangko ka·engachim, uandakgipa biaprangko chinga skanggipa on·na tik ka·aha aro iako Assam sorkariba ra·chakaha,” ine West Khasi Hills Regional Committee-ni chairman parakataha.
Ia biaprango aino pangchake Meghalaya a·dok ning·ona ra·bapilna gita cholrang dongenga ineba Lyngdoh parakataha.
Assam sorkarini bakrimanichi ru·uta bilsirangna meligrikna man·jaenggipa biaprango namgrikaniko aro tom·tomaniko ra·bapilna man·gen ineba Lyngdoh parakataha.
Ia jolrango meligrikna man·jaenggipa biaprang donga ine dolgni regional committee-rangan ku·rachakaha ine janapatengon, ia biaprango meli nangrimaniko ra·bapilna gita a·dok damgnian ma·sichakgrike kamko ka·gen aro iana dolgni regional committee-rang, August 15 tarikni ja·man Shillong-o tom·tomtaigen ine Lyngdoh parakataha.