TURA: Re·anggipa Sombar salo, Central Agricultural University (CAU)-ni ning·o donggipa Tura-ni College of Community Science-oba Textile & Apparel Designing Department aro AICRP-WIA nangrimenba, National Handloom Day-ko maniani bak gita Exhibition-cum-Fair & Weavers workshop-ko ong·atangaha aro ia program-ko ong·atanio West Garo Hills a·jani Rongram aro Gambegre block-ni ning·o AICRP-ni deragatgipa songrang baksana South West Garo Hills a·jani Rerapara block ning·o donggipa songrangba bakko ra·angaha.
Ia program-ko ong·atanio West Garo Hills a·jani Additional Deputy Commissioner Dolrich Berin G Momin, mongsonggipa sokgipa ong·e tom·anio bak ra·giparangna aganprakengon, ra·ba dokgipa karkanarangni aro ba·ra dokgipa manderangni gamchatgipa ong·ani bidingo aganangaha.
Ia program-ko ong·atanio Sericulture department-ni Zonal Director Dr Sanre G Momin-ba dongpae jinmana aganprakengon, Sericulture department-ni ning·o ba·ra doke cha·enggipa manderangna ra·gatgipa dingtang dingtang scheme aro cholrangni bidingo agan-talate on·angaha.
Ia program-ko ong·atanio College of Community Science-ni Dean, Dr Jyoti V Vastrad-ba jinmana aganprakengon, jatni bosturangko ra·dona aro ripingna gita ba·ra dokgiparangni changa sapanirangko namdapatna aro ba·ra dokani rokomrangko namdapatna nangengani gimin aganangaha.
Ia exhibition-ko ong·atanio India a·songni salgro salaram jolrango jakkalgipa dingtang dingtang ba·rarang aro ba·ra dokani bosturangko manderangna mesokangaha.
