SHILLONG: Meghalaya a·doko niam gri napsrukanirangko champengna gita Inner Line Permit (ILP)-ko ra·gatchina dabienggipani bidingo a·songni Prime Minister Narendra Modi, name nipilanggen.
A·doko ILP-ko ra·gatchina dabienggipani bidingo name nipiltaigen aro iani bidingo ua Home Affairs Ministry baksa chanchirime, iani bidingo a·dok sorkarina u·iatgen ine Mongolbar salo, a·songni Prime Minister, Meghalaya a·dokni Cabinet minister-na New Delhi-o ku·rachakaniko on·ataha.
Iani bidingo talataniko on·angengon, ian uamangni Prime Minister baksa ru·utbate golporimani ong·aha aro uamangni dingtang dingtang nanganirangko Prime Minister, name knachakaha ine Budbar salo, a·dokni Chief Minister Conrad K Sangma parakataha.
Chief Minister-ni parakatani gitade, Meghalaya Residents Safety & Security Act (MRSSA)-ni giminba Prime Minister-ko gronganio uamang agan-talate on·baaha.
Meghalaya a·doko ILP-ko ra·gatchina ma·mong sorkario dabie, 2019 bilsion Meghalaya Legislative Assembly, resolution-ko ra·manahachim indiba da·o bilsibri batangpilani ja·manoba ILP-ko on·ani bidingo ma·mong sorkari, maming kattarang dongkujachim.
Khasi aro Garo ku·sikrangko Constitution-ni Eighth Schedule ning·o napatchina dabienggipani giminba a·dokni Cabinet minister-rang, a·songni Prime Minister-na u·iataha aro ia kamo dakchakaniko on·china gita PM Modi-ko mol·molangaha ineba Chief Minister parakataha.
“Ia nanganirang donga inen ua an·tangba ma·sia. An·chingni bi·sarang, uamangni ma·sigijagipa ku·sikrangchisa porikkarangko ong·atengani gimin chatro chatrirang porikkarangko sena man·pajaenga aro iani giminba chinga Prime Minister-na agane on·aha,” ine Sangma aganaha.
Indake ong·engon, Chief Minister-ni parakatani gitade, Assam aro Meghalaya a·dokni simarango ong·enggipa golmalrangko namatna agangrikenggipani gimin, HNLC bobil dolko tom·tomaona rimbapilna gita agangrikaniko a·bachengatenggipani gimin aro a·dokna External Aided Project-rangko on·ani giminba uamang, a·songni Prime Minister baksa agangrikaha aro ua ia nanganirangko niatna gita ku·rachakaniko on·ataha.