Tura: India-ni jakgittelani bilsi 75 gapaniko gisik ra·e Azadi Ka Amrit Mahotsav-ko maniengon, CRPF-ni 120 Battalion, ‘Meri Maati, Mera Desh’ campaign-ko ong·ate battalion-oni sianggipa sipairangna mande ra·aniko dakangaha. Ia campaign-ara Mahotsav-ko chipchangatgen.
Tura Dakopgre unit headquater-o campaign-ko ong·atao dingtang dingtang programrangko ong·ataha. Garo Hills-oniko ka·dongrakgipa sipairangko jemangan a·song-chigana janggitangko on·kangaha, uamangko mande ra·angaha.
Garo Hills-oni CRPF sipairang, jemangan a·songna sichakaha, 209 COBRA Commando-ni Constable Utpal Rabha, 87 BN CRPF-ni Suganda Koch- uamangkoba gisik ra·angaha.
Una agreba veer naris, CRPF-oni sianggipa sipairangni nokdangko aro kamoni neng·takgipa CRPF personnel-rangko mande ra·angaha. Tom·anio battalion-ni Commandant, Pramod Kumar Singh, chief guest ong·e bakko ra·angaha.
Tom·anio aganprakataon, Singh, CRPF jawan-rangni a·songna kimkim ong·e dangdike on·ani gimin aganangaha. CRPF jawanrang maming saloba battalion-ni value ‘Service and Loyalty’-ko galja ine janapate, a·songni chadamberangko a·songna dangike on·china didiangaha.
Nehru Yuva Kendra Tura-ni chadamberang cultural program-ko dakangaha. Uni ja·man plantation drive ba bol bipang ge·aniko dakangskaha.
