GSMC-ni Co-Chairman be·eni an·senggijaniko man·enga

TURA: Garoland State Movement Committee (GSMC)-ni Co-Chairman, Te Balkarin Ch. Marak Tura Mini Secretariat mikkango Job Reservation Policy aro Backlog system-na okumu-chake jingjengataniko sal 14-na daka jaman be·enni an·senggijanirangko man·-enga aro Babadam PHC-o sana bananiko dakna re·angaha.
“Je Meghalaya sorkari-ni dingtang dingtang Department-rango A·chikrang kamni bidingo watchanga-ko man·enga.
Una agreba Tura-o Winter Capital-ko ra·bana dabianiko gisik ra·atanikoba dakaha, jean A·chikrangni skangoni dabianina on·chipgija donnenga, jean skango a·dokko man·dilgiparangni kam ka·achi Tura-o songna passed ka·gimin donga-cham,” Balkarin Ch. Marak aganaha.
Ua indakeba agan-kuaha, “Ia minggniko chu·sokatode Economic aro Songsalo solroro namroroanikoba ra·bagen-chim. Tura-o sorkarini minggittam bakrang donggenchim jekai  Legislature, Executive aro Judiciary.
An·chingni chadam-berang ianiko chu·gimik namgniko man·genchim aro ian uamangni mikkangchi janggi tanganio nambata janggi tangnaniko man·-genchim,” Marak aganaha.
Uni saanirang namja-batrororenga aro be·eno saanirangko man·enga; be·en ding·pretenga, high blood pressure ong·enga aro gisiko saabeanirang, suk onggijanirang on·enga. Uni gimin, bilgnanggiparang una dakchakpana nanga aro okumu chake jingjengatna skang gita an·sengiple dongna nirokatchina.