SHILLONG: Meghalaya a·doko National Education Policy (NEP)-ko ia 2022-23 bilsioni NEHU-ni ra·gataniko jegale, first semester-ni class-ko ra·gija jingjengataniko dakangkugenma dontonggen, uni bidingo chanchirimna gita Meghalaya College Teachers Association (MCTA)-ni tom·aniko Sukrobar salo ong·atanggen ine u·iataha.
MCTA-ni general secretary Airpeace W Rani-ni parakatani gitade, da·o dipet uamang, NEHU-ni vice chancellor aro a·dok sorkarionikoba maming aganchakanirangko man·kujaengani gimin Bristibar salona kingkingde Non-Cooperation Movement (NCM)-ko dake, first semester class-rangko ra·kujana gita tik ka·angaha.
Ia bilsionin NEP-ko ra·gatgenchimode a·dokni dingtang dingtang college-rang neng·nikanirangko chagrongna nanggen ine janapattaiengon, college-ni principal saksa ia neng·nikaniko ta·raken namatna nangengani gimin janapataha ine Rani parakataha.
NEP 2020-ko ra·gatani bidingo dingtang dingtang dolrang aro mongsongbate MCTA-ni membor-rang baksa agangrikna gisiko nangjaengani gimin adita salrangna skangsan HYC aro NEHUSU dolrangba suk ong·gijaniko parakatahachim.
Tom·aniko ong·atna ku·rachakaniko NEHU VC-ni ra·pilahani gimin suk ong·gijaniko parakatengon, a·songni jakgitelani salko manina skangan ua (Prof Shukla), iani bidingo tom·aniko ong·atna media-na parakatmanahachim ine HYC-ni president Robertjune Kharjahrin parakataha.
“HYC aro NEHUSU-ni ku·pattiani gitan ua jinma baksa tom·aniko ong·atna ching baksa tom·anion ku·rachakaniko on·ahachim. Ua an·tangni ku·rachakanikon dal·e ra·jahakon,” ine Kharjahrin aganaha.
Ia neng·nikaniko namatna gita MCTA aro dingtang dingtang dolrang baksa tom·aniko ong·atna nangchongmota ineba ua aganaha.
MCTA-ni jingjengatengani a·sel college-rangko ka·anio nangchakeaniko man·engani gimin skigiparangni dabianiko VC knachakjagenchimode HYC nie dongchajawa ineba Kharjahrin parakataha.
