SHILLONG: Bristibar salo, Women Empowerment-ni Assembly Committee, Nongstoin-ni DC office-o donggipa conference hall-o tom·aniko ong·atangaha aro ia tom·aniko committee-ni Chairperson aro MLA Santa Mary Shylla dilangaha.
Ia tom·anio committee-ni gipin membor-rang aro MLA-rang, chong·motan Miani D Shira, Gabriel Wahlang, Adelbert Nongrum, Damanbait Lamare, Marthon Sangma aro Matthew Beyondstar Kurbah-ba dongpae bak ra·angaha.
Ia tom·anio Women Empowerment Assembly Committee-ni Chairperson Santa Mary Shylla, tom·anio bak ra·giparangna aganprakengon, me·chik aro bi·sarangni kosako ong·gija dakanirangko champengna sorkarini jako ra·e ka·enggipa kamrangni gimin talate on·angaha aro kal·aka man·gipa me·chikrangna kakket bichalko on·na gita bangki dongenggipa case-rangko matchotatna kamrangko ta·rakbatatenga ine parakataha.
A·songo dongimin niamrangni bidingo manderangna agan-talate on·na gita awareness program-rangko ong·atchina dingtang dingtang skulrangko, songrangko aro police department-ko ge·etmanaha ineba Shylla parakataha.
Ia tom·anio dongpae bakko ra·anggipa gipin manderangara, West Khasi Hills a·jani Deputy Commissioner Garod LSN Dykes, Superintendent of Police (SP) Bikram D Marak aro dingtang dingtang department-ni officer-rang ong·a.