SHILLONG: Meghalaya a·doko poraienggipa chatro chatrirangni namgnina, National Education Policy (NEP) 2020-ko ra·gatanio meligrikgijanirangko ta·raken namatchina gita Khasi Students Union (KSU) didiangaha.
Sukrobar salo, NEHU-ni Vice Chancellor Prabha Shankar Shukla-ko gronge agangrikani ja·man, kobor ra·timgipa manderang baksa agangrikengon, NEP 2020-ni bidingo Meghalaya College Teachers’ Association (MCTA) aro NEHU-ni gisepo meligrikna man·jaengani a·sel chatro chatrirangsa neng·nikanirangko chagrongna nangenga ine KSU-ni assistant secretary Reuben Najiar parakataha.
“Tom·anio bang·bata college-ni principal-rangan NEP-ko ra·gatna gita ku·rachakaha aro iani sakkirang chingo donga. Indiba college-rango skigiparangsa iako namniktokjaenga. Iani a·sel chatro chatrirangna noksan ong·na gita nangskaenga,” ine Najiar aganaha.
NEP-ko ra·gatanio dingtang dingtang neng·nikanirang donga ine uamang ma·sienga ine janapatengon, syllabus aro chatro chatrirangna study material-rang dongkujan baksana university-ni gitaba niamrangko name tarikuja ine KSU-ni assistant secretary parakataha.
“NEP-ko ra·gatna tarikugijagipa college-rangba dongkuenga aro iako chinga ma·sia,” ine ua aganaha.
Ia pilakko nigope, NEHU-ni Vice Chancellor, college-rango skigiparangni neng·nikanirangko namatchengna nanga ineba Najiar aganaha.
“Skigiparangni neng·nikanirangko namatchina gita chinga VC-ko didiaha. University aro dingtang dingtang dolrangni gaora dakani a·sel chatro chatrirang neng·nikanirangko man·chana nangja,” ine ua aganaha.
Najiar-ni parakatani gitade, NEP-ko jegalenggipa je dolrang baksaba agangrikna kusi ong·aigen ine NEHU-ni VC, KSU-ni dilgiparangna ku·rachakaniko on·ataha.
Indake ong·engon, college-rango skigiparangni neng·nikanirangko namatna man·na gita MCTA aro NEHU-ni gisepo tom·aniko ong·atchina gita KSU, a·dok sorkarikoba didiangaha.
