SHILLONG: Meghalaya a·dokni Job Reservation Policy-ko gital dake nipiltaina expert committee-ko songanio somoi ra·chae dongengani gimin Voice of the People’s Party (VPP) suk ong·gijaniko parakatenba, expert committee-ko ta·rake songchina didie a·dokni Chief Minister Conrad K Sangma-na sedoataha.
Iani bidingo a·dokni Chief Minister-na sedoatengon, Job Reservation Policy-ko gital dake nipiltaina expert committee-ko songani bidingo a·dok sorkari, June jani 1 tarikon u·iataniko on·manahachim indiba da·alonan expert committee-ko songkujaenga ine VPP-ni general secretary AJ Syngkon, suk ong·gijaniko parakataha.
July-ni 13 tariko VPP-ni dilgiparang baksa Chief Minister-ni tom·e chanchirimaniko gisik ra·atpilangengon, expert committee-ko songani bidingo a·dok sorkari, u·iataniko on·na tarimanaha aro ia committee-ni chairman-ko songna gita sorkari kamrangko ka·engani gimin ia kamko antigni ba antigittamni gisepon matchotgnok ine Chief Minister, VPP-ni dilgiparangna aganahachim ine Syngkon parakataha.
“Chief Minister-ni ku·rachakaniko on·aoni da·o jasa ong·pilahani gimin expert committee-ko sorkari man·a dipet ta·raken songgen ine chinga ka·dongenga,” ine VPP, Chief Minister-na seatgipa chittio parakataha.
Meghalaya State Reservation Policy-ko nipiltaina gita expert committee-ko songna, a·dokni Chief Secretary DP Wahlang-chi dilenggipa Search Committee, membor sakbrini bimingrangkode tik ka·manaha ine sorkari parakatahachim.
Expert committee-na membor sakbongani bimingrangko tik ka·manahaode, expert committee-ko jinmana parakatna skang, membor-rangni bimingrangko a·dokni Cabinet ra·chakangchenggen ineba sorkari parakatahachim.