SHILLONG: Meghalaya a·doko gital bikotgipa National Liberation Council of Nongkyndong (NLCN) bobil dolni sakgipin area commander-ko Bristibar salo, Iewduh-oniko rim·na man·aha aro uandaken da·o ia dolni rim·ako man·giparang gimik sak 11 gapengaha.
Iana skang police-rang, NLCN-ni chairman ine chanchichipenggipa mande aro class 10-o poraienggipa me·a bi·sako man·chape gimik sak 10 manderangko rim·na man·ahachim.
“Class 10-o poraienggipa me·a bi·sara HNLC-ni general secretary Sainkupar Nongtraw-ni bakdrang ong·na nanga ine chanchichipenga. Ia me·a bi·sako chinga juvenile home-ona watataha,” ine police official-rang parakataha.
Rim·ako man·gipa manderangoni saksade jagittam an·o dongenggipa me·chik ong·achim aro uko da·o Ganesh Das Hospital-o donenga ineba kobor on·aha.
Police-rangni u·iatani gitade, ia me·chikara NLCN dolna manderangko rimtimgipa aro record-rangko rakkitimgipa ong·e kamko ka·engachim.
Rim·a man·gipa manderangoni sakbongakode Bristibar salo kachari, salchetna police-rangni ning·on donkuchina rai on·ataha aro gipin sakbri manderangkode Sukrobar salo kachario mikkangpaatskaaha.
Police official-rangni parakatani gitade, ia gital NLCN bobil dolko adita sak Khasi aro Jaintia chadamberang bikotahachim aro ia bobil dol, Nagaland a·dokni bobil dolrang baksaba bak dongachim.
Indake ong·engon, rim·ako man·gipa manderangoni saksa mandeni ma·gipa, an·tangni degipako bobil dake chakatgipa dolni ine rim·aniko raken jegalatskaaha aro uni depante maming dakeba iandakgipa kamrango jak donggipa ong·jachim ine talataniko on·angaha.
Ia ma·gipani parakatani gitade, uni depante batanggimin bilsibrina nok rikani kamrangko ka·enggipa mande ong·achim aro kam matchotani ja·manoba ua pangnan noko donge, an·tangni mobile-on somoiko re·atbataiachim.