U·IATTIMGIPAONI
TURA: Garobadha-oni Selsella-ona dakanggipa ramako taria matchotaoni da·o jagittammangsan ong·kuengoba ia rama gita ro·ong aro gipin bosturangko salruragipa garirang, nangana bate bosturangko salruraengani a·sel da·on nosto ong·na gita a·bachengaha.
Koborko on·ani gitade, ia ramara Ampati PWD (Roads) Division-ni ning·o ga·akgipa rama ong·achim aro ia ramako Badri Rai & Company jako ra·e tariahachim.
Adita antirangna skangsan ia rama a·doko nambatsranggipa ramarangoni dilsa ong·ahachim indiba ia rama gita salantian Bangladesh a·songona ro·ong salangenggipa garirang, nangana bate ro·ongrangko gate salengani a·sel da·o sal 90-ni gisepon, a·doko namjabatsranggipa rama ong·skaengaha ine kobor on·aha.
Garobadha-oni Selsella gita Rajabala-ona dakanggipa ramao nalarang dongjani a·selan ia rama a·doko namjabatsranggipa ramarangoni dilsa ong·enga aro ia ramako gisepgriko taripile on·rongengoba, wachi kari sokbaon ia ramani obosta namjana gita a·bachengpilrongaiachim. Garobadha-oni Rajabala-ona dakanggipa ramani kilometre 30 ong·gipa bak namjabatsrangani a·selan ia km 30 ong·gipa ramakon re·na gita manderang, kontasa atamang nangskarongenga ine u·iataha.
Kobor on·timgiparangni parakatani gitade, Garobadha samba jolo donggipa Gonglanggre songoni skanggipa km 5 ramade namkuengani a·sel manderang re·tokalkuenga indiba Boldoka song samba jolona sokahaon ramarang namjana gita a·bachenge manderang neng·nikanirangko man·rongenga.
Ia rama nosto ong·na a·bachengengahani gimin ia ramako tarigipa company-ni manderang da·o ia ramako taripilna gita ua biapona re·angaha indiba uamang ia ramani nosto ong·ani bidingo aganna gita siktokjaha ine kobor on·timgiparang parakataha.
Ia ramani nosto ong·na a·bachengahani gimin Ampati-ni PWD official-rango sing·sandiatskaon, ia rama gita bosturangko nangana bate gatjachina mikrakataniko on·ani ja·manoba ro·ong salenggipa truck garirang, ro·ongrangko nangana bate salahani a·sel ia ramarang ta·raken nosto ong·pilengaha ine parakataha.
“Forest department-ni on·gipa transit pass-o metric ton 9-na bate bosturangko gatjachina truck garirangna ge·etaniko on·ahachim indiba ia truck garirang, metric ton 35-40-na batpile ro·ongrangko salbaengani a·selsa da·o ia ramarang nosto ong·na a·bachengaha. Ia ramao weigh bridge-rangba dongjae ia garirang, skatang bosturangko salrurana man·enga,” ine Ampati-ni PWD official saksa parakataha.