U·IATTIMGIPAONI
SHILLONG: Meghalaya aro Assam a·dokni simao golmal ong·enggipa Langpih jolrangko re·ange nina skang, ia a·dok damgnini regional committee-rang, re·baenggipa August-ni 26 tariko tom·e chanchirimangchenggen ine Meghalaya a·dokni Cabinet Minister Paul Lyngdoh parakataha.
“Langpih jolona re·ange jolo songdongenggipa manderangko grongena gita chinga tarisamsoengon, a·dok damgnini regional committee-rang, August-ni 26 tariko tom·e chanchirimanggen,” ine Lyngdoh, jean West Khasi Hills regional committee-ni chairperson-ba ong·engachim, kobor ra·timgiparangna parakataha.
Adita salrangna skangba a·dok damgnini regional committee-rang, Guwahati-o tom·aniko ong·atangenba, West Khasi Hills a·jani Langpih-ona re·ange, jolo songdongenggipa manderangko, dingtang dingtang dolrangko aro songni dilgiparangko gronge agangrikna manchie donangahachim.
Lyngdoh-ni parakatani gitade, je biaprangon maming golmalrang dongjachim aro je biaprango songdongenggipa manderang, Meghalaya a·dok ning·o ong·na nangniktokengachim, uandakgipa songrangkode uamangni nangnikani gita dakna on·gen ine Assam-ni regional committee-ba ra·chakangaha.
“Golmal donggijagipa biaprang, jerango songdongenggipa manderangan Meghalaya a·doko ong·na sikengachim, je manderangan Meghalaya a·doko voter ID card-rang dongachim aro je biaprangon Meghalaya sorkarini gita kamrangko ka·engachim, uandakgipa biaprangkode Meghalaya a·dok ning·on ong·china chinga tik ka·aha aro iako Assam sorkariba ra·chakaha,” ine West Khasi Hills Regional Committee-ni chairman parakataha.
Indake ong·engon, Assam aro Meghalaya a·dokni regional committee-rang, re·ange songni manderang baksa agangrikena skang, Sombar salo West Khasi Hills district administration-ba dam 53 songni dilgiparang aro Langpih jolrangko man·chapenggipa Nongmynsaw Syiemship-ni dilgipa baksa tom·e agangrikangaha.
Hima Nongmynsaw Syiemship-ni executive secretary Serbilin Lyngdoh-ni kobor ra·timgiparangna parakatani gitade, ia tom·anio sima jolrango meligrikna man·jaenggipa songrangni bidingo chanchirimangenba, Meghalaya sorkarini ra·gatgipa dingtang dingtang scheme-rangni giminba songni manderangna agan-talate on·angaha.
Langpih songko Assamese-rangni ‘Lumpi’ ine mingskaani giminba ia tom·anio chanchirimangaha ine Lyngdoh parakataha.