U·IATTIMGIPAONI
TURA: Adita salrangna skang, ICAR-ni ning·o donggipa West Garo Hills a·jani Krishi Vigyan Kendra (KVK), National Innovations on Climate Resilient Agriculture (NICRA) project-ni ning·o dingtangmancha Marapara songo awareness program-ko ong·atangenba, da·ororo matchurango man·enggipa Lumpy Skin Disease (LSD) sabisini bidingo songni nokni manderangna agan-talate on·angaha.
Ia LSD sabisiara matchu matterango ta·raken batrikrikgipa sabisi ong·e jile kae cha·enggipa manderangna bang·en noksan ong·aniko ra·bana man·gipa sabisi ong·ani gimin KVK-ni official-rang, ia sabisini bidingo songni manderangna agan-talate on·angenba, maikai matchu matterangko chel·chakna nangachim, uarangni giminba talate on·angaha.
Adita salrangna skangsan Garo Hills-oba ia LSD, matchu matterango batrikrikahani a·sel kae jile cha·enggipa manderang bang·batan noksan ong·ataniko man·na nangahani gimin KVK-ni official-rang, ia awareness program-ko ong·atangaha.
Ia program-ko ong·atanio Marapara, Rongbokgre, Sanengre, Bagugre, Nadandagre aro uandakgipa dingtang dingtang songrangoni gimik sak 39 kae jile cha·enggipa manderang bakko ra·angaha.
Ia program-ko ong·atanio KVK-ni official Dr Sagarika Borah, mitam jile kae cha·enggipa manderangni nokrangona re·ange, LSD man·gipa matchu matterangna antibiotics-rangko su·e donangaha.