U·IATTIMGIPAONI
Tura: A·dokni education namen ja·manchakenganina jajrenge Garo Students’ Union (GSU), education system-ko nipilanganiko dakangaon, a·dok authority-ni gisik nange kam ka·ani komiani a·sel education, uan bai bai ong·e dongenga ine aganaha. Indake ong·engon, education aro gipin a·barango a·joltangni manderangna dongipa quota seat-o gipin a·dokrangonisa maidake ua seat-ko man·enga, iani giminba NGO sing·doaha.
Iana skang KSU-ba gipin a·dokoni sak 11 student-rang maidake specialize stream-rango poraina man·enga, iani bidingo sing·ataha.
“A·dokni manderangna kangimin biaprangkoba cha·bokenga, iarang gimikan niam pe·ani ong·a. Iarangni gisepon health minister an·tangba, gipin a·dokrangoni student-rang a·dokona re·bae medical college-rango napengako u·ia. Knasona man·ani gita, uamang Ampati (SWGH) district-oniko nangnikgipa lekkarangko man·aha aro an·tangtangko permanent resident ba songdongkamgipa ine agana, ine Tengsak aganaha.
Iandakgipa obosta ong·ako ra·chakna man·jawa ine janapate GSU, gipin a·dokoni ba non-indigenous student-rang jemangan medical education-o napna jotton ka·enga, uamangko list-oniko ra·galna nanga ine aganataha.
NEP, haida gimik student-rangna apsangrikgipa cholrangko on·naba gnang indiba bang·a student-rangan mongsongbate cholgri nokdangni student-rangde apsangrik susagrikna cholko man·paja.
Kattako pangkimatna CUET-ni gimin janapataha. A·dokni student-rang CUET porikkako sena mangmang chel·e songrena nanga, gipin chel·a biaprangon re·ange je biapona uamang changsaba re·a doa dongja, uandakgipa biaprangona re·e porikkako sena nanga.
“India-ni dingtang dingtang bakrango college aro universities-na porikkarangko seataniara gimiknade apsangrik chol ong·jaenga. Student-rangna dingtang dingtang exam centre-rangko tikata aro gipin a·dokrangoni studentrang jemangan Meghalaya -ona re·bae a·dokni studentrang baksa susagrikenga, ian a·jolni student-rangna dongimin biapko ra·sekea gita ong·a, ian education system-ni niamko pe·a gita ga·aka. Minggipin ian Sixth Schedule aro Job Reservation Policy-ni roster system-ni niamrangko kal·ake roaming apsana. CUET-ni exam centre-rangko a·doktangon donna nanga, ine NGO dilgipa aganaha.
Niatgenchimode bang·gija Garo student-rangsan DIET porikkako pass ka·engani giminba adita sing·doanirang nakataha. Mitamrang system-ko galenga aro mitamrang Garo Hills-ni eduction ja·manchakani gimin ong·a ine aganskaa.
Iarangna agreba NGO dilgipa, gipin a·dokrangoniko bang·e doctorrangko kamo rakkiani giminba sing·doaha.
“Garo BSc. Nursing student-rangoni saksamangba MLHP-o apply ka·gipaan dongja, ian Garo Hills-na namen dukni ong·a, minggipin iarangara Roster System-ko kal·akanian ong·a.