U·IATTIMGIPAONI
TURA: Meghalaya National Health Mission (NHM)-ni gita Mid-Level Health Provider (MLHP)-ni kamna ra·anio A·chik candidate-rangko nichanggale, gipin biapni candidate-rangkosa ra·ahani gimin Meghalaya Pradesh Youth Congress (MPYC)-ba a·dok sorkariko matnangataha.
Garo Hills-na MLHP-ni kamrangko gipin biapni candidate-rangkosa seokahani gimin sorkariko matnangatengon, “Iandake sorkarini A·chik candidate-rangko nichanggalaniara namen dukni ong·a. A·chikrangba gipin jatrang gitan sorkarini simsakaniko aro mande ra·aniko man·na nangachim,” ine MPYC-ni general secretary Junebirth C Marak parakataha.
Marak-ni parakatani gitade, dingtang dingtang kamrangna mikkang nitee seokaniara sorkarini A·chikrangna simsakgijaniko mesokani ong·aha aro ian namen ra·chakna man·gijaniba ong·ahachim.
Meghalaya a·dokni dingtang dingtang health & wellness centre-rango donatna gita sak 21 MLHP-rangko ra·taina gital dake advertisement-ko on·ataiahani gimin sorkariko mittelpilangskaengon, dingtang dingtang dolrang jegalatani ja·manosa ia u·iataniko on·taiaha indiba kamna manderangko seokanio pangnan kakket ong·e gimiknan cholko on·na nanga ine MPYC-ni general secretary parakataha.
Iani bidingo a·dokni chief minister, health minister aro NHM-ni mission director-ko dai channa nanga ine janapatengon, MLHP-ni kamna seokanio niamrangko name ja·rikama ja·rikja, uarangko ma·sina gita iani bidingo sandirokaniko dakna nanga ine MPYC dabiangaha.