U·IATTIMGIPAONI
SHILLONG: Meghalaya a·doko National Education Policy (NEP) 2020-ko Undergraduate course-rangosan ong·aigija secondary aro higher secondary gadangrangoba ra·gatna sorkari miksongenga ine Mongolbar salo, Education department-ni Advisor HM Shangpliang parakataha.
Iani bidingo kobor ra·timgiparangna talataniko on·angengon, a·doko Education Commission baksana textbook review committee gita dakgipa dingtang dingtang committee-rangkoba sorkari songe on·enga ine Shangpliang parakataha.
Shangpliang-ni parakatani gitade, ia textbook review committee-an, gital syllabus aro gital curriculum-rangko ra·bana gita sorkarina ku·pattianirangkoba ra·anggen.
NCERT-ni ki·taprangko MBOSE gita ra·bana uamang cholrangko nienga ineba Education department-ni Advisor parakataha.
Meghalaya a·doko bang·bata college-rangan NEP-ko ra·gatahani gimin college-ni gadangode NEP-ko a·bachengatmanaha ineba Shangpliang aganaha.
Ia 2023-24 academic session-oni NEP ra·gataniko NEHUTA aro MCTA-ni jegaltokengani gimin sing·on, NEHU-ni Vice Chancellor Prof PS Shukla an·tangan iani bidingo MCTA baksa agangrikna a·bachengataha ine uamang knasoahani gimin ia kamko NEHU-ni VC-nasa pakwatenga ine Shangpliang parakataha.
NEP-ni bidingo sorkaride nanga gita talatanirangko on·manaha ineba ua aganaha.