U·IATTIMGIPAONI
TURA: Dalu GHADC Constituency-ni MDC Promod Koch, Budbar salo, an·tangni manderang baksa National People’s Party (NPP)-o napangaha aro uko NPP-ona rimchaksona gita tom·aniko ong·atanio GHADC-ni CEM Albinush Marak, GHADC-ni executive membor-rang, MDC-rang, NPP West Garo Hills-ni district president Dr JD Sangma, general secretary Mathias N Marak, block president Lonerson Ch Marak aro NPP-ni gipin dilgiparangba bak ra·angtokaha.
An·tangni NPP-o napani gimin talataniko on·angengon, ua Chief Minister Conrad K Sangma-ni dilanichi NPP-ni kamrangna aro a·dokosan ong·aigija pilak biaprangon namroro silroroaniko nikna man·engani gimin NPP-o napna tik ka·aha ine Koch parakataha.
Mikkangchi Meghalaya a·dokna aro mongsongbate Garo Hills-ni manderangna namroro silroroaniko ra·baanio uamang, NPP baksa kamrangko ka·anggen ineba Koch parakataha.
2020 bilsini GHADC election-o Promod Koch, BJP-ni tikitchi susae, Dalu constituency-ni MDC-na seokako man·achim.