‘NEP-ko ra·gatna skang expert-rang nichengna nanggen’: Pyngrope
U·IATTIMGIPAONI
SHILLONG: National Education Policy (NEP) 2020-ni bidingo meligrikgijaniko namatenba dolgnini gisepo maiba songgigrikaniko dakchina gita a·dokni Trinamool Congress (TMC), Meghalaya College Teachers Association (MCTA) aro North Eastern Hill University (NEHU)-ni Vice Chancellor Prof PS Shukla-ko didiataha.
NEP-ni bidingo meligrikgijaniko namatchina mol·molatengon, “Iani bidingo meligrikgijaniko nama bewalo namatchina chinga didina sikenga. NEP-ko name ra·gatna man·na gita dolgnini gisepo songgigrikaniko dakna man·gen aro iano pilak dolrangan bakrimaniko on·na kusi ong·aigen,” ine TMC Meghalaya-ni state vice president George B Lyngdoh parakataha.
NEP-ko ra·gatanio dingtang dingtang neng·nikanirangde dongaigen ine janapatengon, dolgni matnanggrike donganichide ia neng·nikaniko namatna man·jawa indiba dolgnini gisepo ma·sichakgrike songgigrikaniba dongna nanggen ine Lyngdoh parakataha.
“NEP-ko ra·gatanio dingtang dingtang neng·nikanirangde donggen ine anga skigiparang baksa agangrikanio ma·sina man·aha indiba iandake mikneng mikbugrike dongaianichide maming namgniko ra·bana man·jawa aro dolgnini gisepo songgigrike ramako tarichengna nanggen,” ine ua aganaha.
Lyngdoh-ni parakatani gitade, MCTA aro NEHU-ni VC dolgnian an·tangtangni nangnikanirangosa pangchake dongaigenchim ong·ode chatro chatrirangsa bon·kamao neng·nikanirangkode chagrongna nangaigen.
Gital niamrangko ra·gataniode pangnan neng·nikanirangde dongaia ine janapatengon, NEP-ko ra·gatanioba kam ka·giparangko aro nokrangko nangdapengani gimin bang·en korosrangko nangkugen aro iarangkode institute-rangni chol ong·anikoba nina nanggen ine TMC-ni vice president parakataha.
NEP-ko a·bachengatanio ma·mong sorkari, iandake nanganirangko on·na gita mai ja·kurangko de·aha ineba ua sing·doataha.
“NEP-ko ra·gatenba maming dakchakanirangko on·jaenga ong·ode ian ma·mong sorkarini dal·bea gualani ong·enga. Uni gimin NEP-ko ra·gatengon, skigiparangni aro college-rangni nanganirangkoba sorkari niatskana nanggen,” ine Lyngdoh aganaha.
Indake ong·engon, NEP 2020-ko skatang ra·gataniara mikkangchi chatro chatrirangna neng·nikanirangko ra·baani ong·gen ine NEP-ko expert-rang ba u·i-ma·sigipa manderang name nipiltaikujaskal a·doko NEP-ko ra·gatkujachina gita TMC Meghalaya-ni state president Charles Pyngrope, a·dok sorkariko didiatskaaha.
A·doko NEP-ko ra·gatani bidingo sing·anina aganchakaniko on·angengon, “Ian an·chingni chatro chatrirangna mikkangchi neng·nikaniko ra·baani ong·gen,” ine Pyngrope parakataha.
Meghalaya a·dokoba NEP-ko ia 2023-24 academic session-onin a·bachenggnok ine adita salrangna skangsan, a·dokni Chief Minister Conrad K Sangma aro Education Minister Rakkam A Sangma parakatahachim ine nikna man·a.
St Edmunds College-ni principal baksa an·tangni gronge agangrikgipani bidingo janapatengon, NEP-ni bidingo che·em che·em nipilna man·na gita expert committee-ko songna nangenga ine TMC-ni state president parakataha.