U·IATTIMGIPAONI
TURA: Adita salrangna skang, Mid-Level Health Provider (MLHP)-ni kamna A·chik candidate-rangko nichanggale gipin biapni candidate-rangko seokanio kamna advertisement on·chenganiba dongjachim ine Garo Hills-ni FKJGP, ADE, AYWO, FAF aro GSU dolrang a·kangatenba, ian Meghalaya sorkarini kamna ra·anio dongimin niamrangko pe·ani ong·aha ine matnangataha.
Iani bidingo NGO-rang, dingtangmancha a·dokni Chief Minister Conrad K Sangma-na memorandum-koba on·ataha.
Adita salrangna skang, Garo Hills-o MLHP-ni kamna ra·anio B.Sc Nursing baksana Community Health-ni certificate donggipa candidate-rangkosa campus recruitment dake Shillong-ni NEIGRIHMS aro Woodland Hospital nursing college-rangonikosan ra·aiahachim aro Garo candidate-rangde ia kamna saksakoba ra·jahachim ine nikna man·a.
Indake ong·engon, ia kamna sorkarini u·iatanirangko NGO-rang che·em che·em sandirikkite niahachim indiba ia kamna advertisement on·anikode nikna man·jaha ine parakatskaaha.
India a·songo donggipa pilak Nursing college-rangon B.Sc Nursing aro Post B.Sc Nursing curriculum baksana Mid-Level Health Provider-ni basic course-koba on·china Indian Nursing Council-onin u·iataniko on·manahahchim ine janapatengon, MLHP-ni kamna GNM nurse-rangde qualify ong·ja ine seanikode uamang nika dongjachim ine NGO-rang parakataha.
A·doko iana skangba, GNM aro B.Sc Nursing candidate-rangko MLHP-ni kamo ra·ahachim ine janapatskaengon, ia changode maini gimin GNM aro B.Sc baksana Community Health-ni certificate-koba nangskaaha ine NGO-rang sing·doataha.
“MLHP-ni kamna advertisement on·aniko chinga sandibeahaoba nikteljaha aro ian Meghalaya sorkarini dongimin niamrangko NHM-ni Mission Director pe·aha ine mesokani ong·enga. Uni indakgipa kamchi a·doko songdongenggipa dingtang dingtang jatrangni gisepo ma·sisretgrikaniko ra·bana man·a, uni gimin ia official-ni kosako sandirokenba nanga gita ja·kurangko de·na nanga,” ine NGO-rang parakataha.
MLHP-ni kamna Meghalaya sorkari, 2022 bilsini ja·man B.Sc Nursing course-ko pass ka·gipa candidate-rangkosan ra·aha ine NHM Meghalaya-ni official-rang talataniko on·na jotton ka·ahachim ine janapatskaengon, kamna seoka man·gipa candidate-rangni gisepo, B.Sc Nursing course-ko on·gijagipa Bethany GNM Nursing School-ni candidate-rangba dongskaa ine NGO-rang parakataha.