U·IATTIMGIPAONI
SHILLONG: Re·baenggipa 2024 bilsini Lok Sabha election-o susana gita Trinamool Congress (TMC) Meghalaya-ni state president Charles Pyngrope, TMC-ni state vice president George B Lyngdoh-ko candidate-na minge donataha indiba Tura Lok Sabha seat-na candidate-ko seokna gitade a·dokni gitcham chief minister aro TMC-ni dilgipa Mukul Sangma-na pakwate on·angskaaha.
Re·baenggipa bilsini Lok Sabha election-o TMC, Tura aro Shillong Parliamentary constituency damgnion susaanggen ine parakatengon, “Da·o dipet candidate-rangko seokani bidingo chinga TMC-ni general secretary in-charge Dr Manas Bhuya baksa agangrika dongkuja indiba ia pringo anga unbaksa agangrikatenba, election-ni bidingo chanchirimna gita ua Shillong-ona re·bagenma anga Kolkata-ona re·angna nanggen, uani bidingo uko sing·ataha,” ine Pyngrope parakataha.
Lok Sabha election-o susana gita a·dokni damgni constituency-nan candidate-rangko tik ka·manahama ine sing·anina aganchakaniko on·angskaengon, “Da·o dipet candidate-rangko tik ka·mansrangade ong·kujaenga aro chinga iani bidingo TMC-ni high command baksa agangrikna nanganirang dongkuenga indiba chingo candidate-rangde dongaha,” ine TMC-ni state president parakataha.
Candidate-rangko biming mingani gimin janapatskaengon, Shillong-nade ua TMC-ni state vice president George B Lyngdoh-ko kranikenga indiba Tura-nade TMC parliamentary party-ni dilgipa Dr Mukul Sangma-na pakwate on·enga ine Pyngrope parakataha.
TMC-oni an·pilanggipa aro NPP-ni tikitchi Shillong constituency-o susana miksongenggipa BJP-ni HM Shangpliang-ni gimin janapatskaengon, “Shillong seat-o susana NPP-ni dilgiparang Shangpliang-na tikitko on·genchimoba anga an·tangde maming ong·gijakode nikja,” ine Pyngrope parakataha.
Da·o dipet Shangpliang-ko champengna maming niamrang dongjani gimin ua an·tangni nangnikgipa je dolchiba napangna man·aigen ineba ua aganaha.
Indake ong·engon, NPP dolni gitade, Tura Lok Sabha constituency-na da·o ong·enggipa MP Agatha K Sangma-kon minge donenga indiba Shillong seat-nade candidate-ko tik ka·skakujaenga ine kobor on·aha.