U·IATTIMGIPAONI
SHILLONG: Batanggimin chang Lok Sabha election-o National People’s Party (NPP), United Democratic Party (UDP) baksa bakrime susaahaoba re·baenggipa 2024 bilsini election-ode doltangari susaaigen ine Sukrobar salo, NPP-ni state president WR Kharlukhi parakataha.
Kharlukhi-ni parakatani gitade, re·baenggipa bilsini Lok Sabha election-o NPP, salgro salaram jolni pilak seat-rangon susana miksongenga indiba da·o dipet candidate-rangko seokskakujaenga.
“Chinga man·a dipet pilak seat-rangon candidate-rangko susaatgen indiba da·o dipet candidate-rangkode chinga seokkujaenga. Batanggimin changrangode UDP aro NPP nangrime candidate-rangko susaatrongachim indiba ia changode chinga doltangni candidate-kon susaate chegipa ong·na krenggen,” ine NPP-ni state president aro Rajya Sabha-ni MP parakataha.
Ia bilsini Assembly election-o NPP, Garo Hills-o chu·sokgipa ong·ahaoba Khasi aro Jaintia Hills a·jarangode inditana chu·sokgipa ong·jahani gimin sing·on, “Ia changode chinga Khasi aro Jaintia Hills jolrangnaba name tarisamsoaha. Ia bilsini Assembly election-o result-ko name nigenchimode chinga bang·bate vote-rangko cheaha aro iako nigenchimode chinga da·o Khasi aro Jaintia Hills a·jarangoba chegipa ong·na ka·dongenga,” ine Kharlukhi aganaha.
Lok Sabha election-o salgro salaramni pilak seat-rangon susana miksongenga ine janapatengon, “Parliament-o salgro salaram jolrango songdongenggipa manderangni ku·rangko knaatna gita chinga komibeoba sak 15 ba sak 20 MP-rangko ong·katatna nisan donenga,” ine NPP-ni state president parakataha.
Salgro salaram jolrango dilgiparang dingtang dingtang ong·engani a·selsa manderangni nanganirangko Parliament-o knachakjaenga ineba ua aganaha.
“Khasi aro Garo ku·sikko Eighth Schedule-o napatchina aro ILP-ko ra·gatchina dabie sorkari resolution-ko ra·ahachim indiba ma·mongo sorkari iarangko chu·sokate on·kujaenga. An·chingni gisepon bakrimani dongjagenchimode iarang chu·sokgipa ong·chipjawa,” ine Kharlukhi aganaha.