U·IATTIMGIPAONI
TURA: Re·anggipa July jani 24 tariko, Tura-ko Winter Capital songchina aro Reservation Policy-ni Roster system-ko backlog policy gnang ra·gatchina dabienggipani bidingo dingtang dingtang dolrang baksa Chief Minister Conrad K Sangma-ni Tura Mini Secretariat-o tom·e agangrikengmiting somoio rang·gitik so·sojengjeng ong·anina police-rang Robibar pringo, Garoland State Movement Committee (GSMC)-ni co-chairman Balkarin Ch Marak-koba rim·aha.
Ia so·sojengjeng ong·anina police-rang, ACHIK dolni dilgipa Bernitha R Marak, gitcham MCS officer Laben Marak aro GSMC-ni dilgipa Balkarin Ch Marak-ko rim·na sandiengachim aro gitcham MCS officer Laben Marak-kode re·anggipa August jani 17 tarikon rim·na man·ahachim.
Koborko on·ani gitade, police-rangni rim·aoni jokna gita GSMC-ni dilgipa Balkarin Marak-ba dongnue dongengachim indiba Robibar pringo West Garo Hills aro East Garo Hills a·jani police-rang uko, East Garo Hills a·jani Samanda jolo donggipa Bansamgre songoniko rim·na man·aha.
Marak-ko rim·ani ja·man police-rang Robibar salon joljol uko kachario bichalna rimangaha aro uko kachari salgnina police custody ning·o donchina rai on·ataha.
Iana skang, ACHIK aro GSMC-ni dilgipani kosako police-rang, Unlawful Activities Prevention Act-ni ning·o mokordoma ka·ahani gimin police-rang rim·na man·jana gita uamang sakgittaman Meghalaya High Court-o anticipatory bail-na dorgasto galahachim indiba uamangni dorgasto galaniko Meghalaya High Court jegalatskaahachim.
Ia sakgittam dilgiparangoni Laben Marak aro da·o Balkarin Marak-koba police-rang rim·na man·aha indiba ACHIK-ni general secretary Bernitha R Marak-de kate dongskakuengachim.
Tura-ni Mini Secretariat ba CMO-o rang·san manderangni ro·ongrangko goe aro wa·alrangko so·e chadrapani a·sel komibeoba sak 18 sipairang saknaanirangko man·na nangahachim aro komibeoba bol 20 garirang nosto ka·ako man·na nangahachim.
Ia so·sojengjeng ong·atanio jak donganina police-rang da·o dipet komibeoba sak 50 manderangko rim·na man·ahachim.
Tura-ko Winter Capital songchina aro reservation roster-ko backlog policy gnang ra·gatchina dabie ACHIK-ni dilgipa Laben Ch Marak, ACHIK-ni general secretary Bernita Marak aro GSMC-ni co-chairman Balkarin Marak, okumu chake jingjengataniko dakdilahachim ineba nikna man·a.