MLHP post-ni bidingo Garo Hills-ni pressure group Ampareen-ko gronga

U·IATTIMGIPAONI

SHILLONG: Garo Hills-oni presssure group-ni dolrang Mongolbar salo Health Minister Ampareen Lyngdoh-ko gronge Middle Level Health Providers (MLHP) 2023-o appointment ba kamna mande rakkianiko dondipate, ia chu·gimik recruitment process-ko sandianiko dakchina dabiaha.
FKJGP (Garo Hills)-ni president, Pritam Arengh-ni aganani gita, adita salrang skangsan Mission Director, National Health Mission Meghalaya, Memo No. DHS/MCH&FW/NHM/MLHP/20/2023/III), dated 23.08.2023-ko issue ka·aha. Jeon adita sak candidate-rangko MLHP post-na appointment-ko on·aha. Meghalaya Garo Hills-ni dingtang dingtang bakrango bangbange ong·e donggipa MLHP post-na mandeko gapataha.
“Garo Hills a·jani MLHP-ni post-na manderangko rakkiao saksamangba Garo ba jolni candidate dongja, iako nike Garo Hills-ni manderang jagokpilaha.”
Uamangni an·tangni am·sandiao u·ina man·aniko parakatengon, uamang minggipin ba ge·gipin circular Vide Memo No DHS/MCH&FW/NHM/MLHP/20/2023/(11), dated 11.08.2023-o nikna man·aha, jeon MLHP aro Health and Wellness Centre-rango bangbang ong·e donggipa post-rangko gapatna applicant-rang August 17 2023-o uamangni document-rangko verification ka·na nanggen aro counselling ka·na nanggen ine ge·etaha. Indiba da·onan ua advertisement-o pangchake on·gipa  maming circular-an dongja, ian recruitment process ba kamna mande rakkianio dongimin niamrangko ja·rikja ine talen nikna man·a, ine aganataha.
Uandake iani bidingo Health Minister-ko grongani gimin janapatengon, ‘ia chu·gimik recruitment process-ko maming advertisement on·gija dakangaha uni gimin ia post-rangna gital dake manderangko ra·china mol·molaniko on·aha, ine aganaha.
Organisation-ni memborrang baksa PHE Minister Marcuise Marak aro Education Minister Rakkam A Sangma- uamangba Health Minister baksa agangrikangaha.