U·IATTIMGIPAONI
SHILLONG: Jensomaio parliemantary election-rang sokbaa uno chanchigen ine United Democratic Party (UDP) aganaha.
“MLA-rang aro MDC-rang bang·en donganichi Khasi aro Jaintia Hills-o chingni pangchakani mangrakgipa ong·enga aro chingo candidate namgipa dongode MP election-rango susana chinga amgen,” UDP General Secretary Jemino Mawthoh ka·donge aganaha.
UDP bang·a a·jolni candidate-rangna baten 34 per cent vote share-ko man·ako janape, ‘‘MP-naba sak 12 MLA-rang sak 17 MDC-rangchi chinga ia changoba ka·dongenga,” ua aganaha.
MP election candidate-na party chanchia dongkujaenga, iani bidingo ru·utgija salni gisepo UDP, MP election-ni gimin chanchigen aro HSPDP-chi agantaiako man·aha maina chinga ia RDA-o ku·cholsan ong·enga indake chinga HSPDP baksa ku·cholsan iani gimin chanchinaba donga,” ua aganaha.
HSPDP aro UPD-ni gisepo ramramgipa candidate ong·genba ine sing·anina, ‘‘Ramramni orto chinga apsan miksong-chanchianina kamko ka·enga apsan chanchiani maming neng·nikani ong·jawa” ua aganaha.
“Chinga gipinrangkoba nangnikenga aro uamang chingni toko napna sikode uamangkoba rimchaksoa,” ua agandapaha.
Uamangni MDA bakrimgipa NPP ia chango dolsantangtang susana baseaha aro Shillong seat-na UDP baksa ramram candidate-ko susaatjawa, MP election-na chakatani gimin gipin party-rangni bidingo agana mamingkon agana nangnikjaenga maina party gimikan uamangni chanchiatangtang donggen. Indake party chingaba chingni chanchiani donga, ua aganaha.
NPP-na, da·o ong·enggipa MP Agatha Sangma Tura seat-oni susatainaba donga. Party uni adatang aro Chief Minister Conrad K Sangma-chi dilani ong·enga indake Shillong seat-na uamangni candidate-rangko parakatkujaenga.
Congress, brigipa changna Shillong seat-oko man·piltaina Vincent H Pala-ko susaatna miksongtaienga. Party Tura seat-na uamangni candidate-ko mingkujaenga.
Voice of the People Party, 2024 parliamentary poll-rangna Shillong seat-o uamangni general secretary Ricky AJ Syngkon-ni candidate ong·aniko parakataha.
TMC-ba, MP election-rangna uamangni candidate-ko bon·kame tik ka·na chanchia dongkujaenga.