U·IATTIMGIPAONI
TURA: East Garo Hills a·jao donggipa Rongjeng, Songsak aro Rongrenggre forest reserve-rangoniko bol cha·ue Assam aro gipin biaprangona palsrukatanio jak donggipa gari bolgniko Mongolbar walo, A·chik Holistic Awakening Movement (AHAM) Eastern Zone-ni membor-rang, rim·na man·aha.
Rim·ako man·gipa gari bolgnioni bolsade ML-07 9770 Alto gari ong·achim aro ian Williamnagar Nengsila gittimni saksa Drill Ch Sangma minggipa mandeni gari ong·achim ine kobor on·aha.
AHAM-ni rim·gipa gari bolgipinara AS-18AC 4160 Bolero pik up ong·a aro ja·mano ia garirang baksana AHAM-ni rim·gipa bolrangko, East Garo Hills a·jani Forest department-na pakwate on·ataha.
Mikkangchiba iandake bol cha·ue salanirangko banoba nikgenchimode, ta·raken uamangna u·iatskachina gitaba AHAM, jolo songdongenggipa manderangko mol·molataha.
