U·IATTIMGIPAONI
SHILLONG: Meghalaya aro Assam a·dokni Karbi Anglong jolrango songdongenggipa manderangni gisepo meligrikgijanirang batroroengon, a·dok damgnini simarango ong·enggipa obostarangko namatna kam ka·anio neng·nikanirangde dongaigen indiba ia jolrango songdongenggipa dolgni manderangan tom·tomao aro meli nangrimao janggi tangna nanga ine Bristibar salo, Meghalaya a·dokni Chief Minister Conrad K Sangma parakataha.
Shillong-o gital nokdonggagipa Karbi Guest House-ni gimin sing·anina aganchakaniko on·angengon, Guwahati-oba saoba Meghalaya House-ko rikna on·janaba gnang indiba iandakgipa obostarangde a·dok damgnini gisepo ong·rongaia ine Sangma parakataha.
Meligrikgijanirangko namatna kam ka·anio pangnande dolsa dolgipin baksa jegrikanichide namatna man·jawa ine janapatengon, Meghalaya a·dokba tom·tomgipa songsalo songdonggipa a·doksa ong·a aro dolgnini gisepo pangnan tom·tomaniko aro meli nangrimaniko rakkina nanga ine Chief Minister parakataha.
“Ra·bianirang aro meligrikgijanirangkode namatna gitade pangnan dolgni agangrikanichisa namatna man·gen. Uni gimin an·chingba Assam-o bebera·aniko bilakbatate an·chingni agangrikanirango kim·kim ong·na nanggen,” ine ua aganaha.