U·IATTIMGIPAONI
TURA: Tura Catholic Diocese-ni bilsi 50 gapaniko maniani bak gita re·anggipa September 15 tarikoni September 17 tarikona salgittamni seminar-ko Tura-ni Walbakgre-o donggipa Diocesan Pastoral Centre-o ong·atangaha aro ia seminar-ko ong·atanio Parish council ge·antionin delegate sakgni re·bae bakko ra·angtokaha.
Ia seminar-ko a·bachengatanio Tura-ni Bishop Rt Rev Andrew R Marak aro Auxiliary Bishop CJ Jose bakko ra·angenba, ia seminar-ko mikkim dongbatataha aro Isolni namgipa kattarangkoba jinmana aganprakangaha.
Ia salgittamna ong·atanggipa seminar-o dingtang dingtang mondolini pamongrang, Bishop-rang aro bang·bea Catholic bebera·giparang bak ra·angtokaha aro ia seminar-o nokdangni gita bi·ani, Sunday School, rongtale janggi tangani aro uandakgipa kamrangni bidingo dingtang dingtang dilgiparang, agan-talate on·angaha.
Tura Diocese-ni bilsi 50 gapani bidingo talate on·angengon, Tura Diocese-ko 1973 bilsio a·bachengatani somoio ia Diocese-ni ning·o parish ge·doksan dongaiachim aro ia parish ge·dokni ning·o sak 40,000-mangni gitasan Catholic bebera·giparang dongaiachim indiba da·o Tura Diocese-ni ning·o ge 46 parish-rang dongaha aro ia parish-rangni ning·o sak lak 3.40-mangni gita bebera·giparang dongaha ine Catholic pamongrang parakataha.
Tura Diocese-ni bilsi 50 gapanio bang·bea skul aro college-rangkoba kuliaha aro iachin A·chik a·songni manderangna a·gilsakni seng·ani baksana an·seng baljokanirangkoba on·na man·aha ine u·iataha.
Indake ong·engon, Tura Diocese-ni bilsi 50 gapaniko re·baenggipa November-ni 5 tariko Tura-ni Don Bosco School kal·chakramo dal·begipa tom·bimonganiko ong·ate matchotatna sienga ine Catholic dilgiparang parakatenba, ia tom·bimonganiona re·bae bakko ra·echina gita Garo Hills gimikni Catholic bebera·giparangko didiataha.