U·IATTIMGIPAONI
SHILLONG: Meghalaya a·dokni gital political dol, Voice of the People’s Party (VPP) bang·e ru·ute tangbangjawa aro KHNAM, PDF, PDM dolrang gitan apsan dake bon·chongdikna sienga ine Opposition Congress dolni dilgipa Ronnie V Lyngdoh parakataha.
“Angni chanchiani gitade, VPP-na balenggipa balwarang bang·e ru·ute dongkamjawa. An·ching a·doko bikotgipa political dolrangni itihasko niatgenchimode VPP-koba anga bang·e ru·ute tangbangako nikatjaenga,” ine Lyngdoh aganaha.
Re·baenggipa 2024 bilsini Lok Sabha election-o Shillong parliamentary seat baksana KHADC aro JHADC election-rangko VPP chegopna siengama ine sing·anina Lyngdoh, ia kattarangko aganaha.
Lyngdoh-ni parakatani gitade, VPP balminduri gita ong·katbaaha aro KHNAM, PDF aro PDM dolrang jekai gimaangahachim, apsan daken gimaangna sienga.
A·songni bimango mikkangpaenggipa Congress gita dakgipa dolrangnasa a·dokni manderang pu·onaigen ineba Opposition dolni dilgipa parakataha.
“National party-ni MP-ko watatosa a·dokna namgni ong·aigen ine manderang ma·sitokaha. Chinga Congress dolo a·dokni namgnina ku·rang on·nagipa gipin MP-rangba dongani gimin ian chingna cholrang nambatenga,” ine Lyngdoh aganaha.
Lyngdoh-ni parakatani gitade, Congress dolsa Meghalaya a·dokni manderangna a·a-chiako aro jatni dakani rikanirangko chel·chakna gita Sixth Schedule-ko on·ahachim.
