U·IATTIMGIPAONI
WILLIAMNAGAR: Mongolbar salo, East Garo Hills a·jaoba Ayushman Bhava campaign-ko a·bachengatani bak gita dingtang dingtang program-ko Williamnagar-ni AH & Veterinary department-ni ning·o donggipa Vocational Training Centre-o ong·atangaha aro ia program-ko ong·atanio dingtang dingtang biaprangoni bang·bea manderang re·bae bakko ra·angtokaha.
Ia program-ko a·bachengate on·anganio East Garo Hills a·jani Deputy Commissioner Vibhor Aggarwal, jinmana aganprakangengon, dingtang dingtang department-rang, jekai Health, Social Welfare, Agriculture aro uandakgipa department-rangni ning·o sorkarini on·enggipa dingtang dingtang cholrangko ra·china a·jao songdongenggipa manderangko didiangenba, ia cholrangko on·anio darangkoba nichanggaljachina gita pilak department-ni officer-rangkoba didiangaha.
Iana skang, ia program-ko ong·atani bidingo East Garo Hills a·jani DMCHO Dr LM Sangma, jinmana talate on·angengon, an·seng baljokanirangko ra·anio MHIS aro ABHA-o biming segatani namgnirangkoba agan-talate on·angjolaha. Namgijagipa sabisirangko ta·raken ma·sina man·na gita seng·gnang porikka ra·e nichina manderangko didiangengon, Health department-ni ning·o on·enggipa indin sanna banani cholrangko ra·china gita a·jao songdongenggipa manderangko Dr Sangma didiangaha.
Ia tom·anio jinmana aganprakanggipa gipin manderangara, Senior Medical & Health Officer Dr Jimmy Carter Ch Marak, District Social Welfare Officer Madonna T Sangma, Songsak-ni Block Development Officer Seldin N Sangma, DM&HO Dr Ivory A Sangma, Additional DM&HO Dr BR Marak aro gipinrang ong·a.
Ia salni bako Ayushman Bhava campaign-ko a·bachengatani bak gita NCD aro TB sabisina porikka ra·ani, Aadhar-na biming segatani, MHIS aro ABHA-na register ka·ani, Poshan Maah stall-rang, Malaria-na porikka ra·e niani aro uandakgipa gipin program-rangkoba ong·atangaha.
